Panagkitakit

[Nabulod laeng ti ladawan a naaramat iti daniw]

Panagkitakit 
[Nagtawataw/Exilo a Daniw]
Ni Rudy Ram. Rumbaoa
[nasurat.4.27.2013.maui]


Adda panagkitakit ti bagi
nga agladingit,
wenno mangannugot ti pannakapaay
tapno isuko ti namnama
a kas iti pannakabulok ti taraon;

Ket iti agay-ayus a karayan, basaek
dagiti imak, luktak dagiti dakulap
ket dalusak dagiti ramay.

Ngem saanakto nga agladingit,
saankonto ipalubos ti pannakapaay
a mangtagikua kaniak

kas iti wagas ti panagrissik ti beggang
no ti lubong ket mairarem iti sirok
dagiti dakkel a bato, aginana
kadagiti parang ken iti taaw, agsadag
kadagiti lames, ruot
wenno ikawes ti tapok.

Matawid kadi ti kinaliday
wenno mapalubosan met laeng
a kas iti pananggemgem
ti nabara a landok?

Bay-annak a makabulos a kas iti pananggandat
ti tumatayab a mawayawayaan iti tangkal
a nakaibaludanna- ket bay-annak
a tumukno kadagiti alimpatok ti arasaas.

Adda met dagiti kanito
a ti namnama, aglaplapunosan, ket

Adda karayan. Diak pulos
nakita.
 

-Copyright.by.Rudy.Ram.Rumbaoa.April.2013
 Dagiti Koleksion a Daniw, Sarita, Kanta, ken Dadduma Pay