Ramut

[nabulod laeng ti ladawan a naaramat]


Saan nga agnanayon a bilangek ti tawenko,
nataenganakon, ngem sumagmamano
kadagiti kayo ti nabati, iti panagmaga ti waig
wenno panagdakkel ti danum iti dan-aw;
nataenganak unayen kadagiti nagtaudan
a puli a nabayagen a dimmapo.

Adda tiempo a dangrannak dagiti nadawel
ken nadagsen a dalluyon, ngem agingga ita,
sibibiagak. Nupay binagkatko ti kaputol
a kayo ti roble, ken iti ipupusay ti daan a biag;
manen, iti biag nga apagrugi, dimmakkelak.

Kunada a naungetak. Ti dadduma, naayatak 
a pagayam ken ama. Sumagmamano kadakuada 
ti desperado ken nangilunod kaniak-- napanda 
iti gangannaet a lugar ket nagpukawda sadiay; 
dagiti dadduma ginab-utda ti ramut ken insilpoda 
iti puon nga aangsak a kasilpo metten ti biag 
nga angsenda. Ket ita, mariknak ti agpitpitik 
iti sibibiag a puso ken iseserrek ti dara kadagiti uratko.

Sika a nangitipon iti dara kaniak, kenka,
sibibiagak. Ngarud para kenka bantayak
panagsabuag dagiti dalluyon, bantayak
ti naulimek a waig, bantayak ti banang-es
dagiti kayo, bantayak ti lapayag dagiti trigo:
kenka, adda biag a kinabuslon
ken naimbag a salun-at!

Agpapigsaka a mangsalbar ti lasag manipud
kadagiti apuy a manguram kenka tapno mailiklik
ti pusok iti nakana a panagsagaba. Wen,
agpapigsaka a mangsalaknib ti matak iti napait 
a lua. Agpapigsaka, sika nga inayatko.

Iti maysa nga aldaw malawlawagan ti puso 
iti panangsapul ti pamedped ti waw, panangtangad
dagiti nasilnag a bituen, ngem bendisionak
ti panagbiahem ken agurayak agingga iti panagsublim:
ditoy panunot, ditoy arpad, iti kabakiran ken namaga
a waig--namnamaem nga addaak sadiay.

Adda dagiti naipalad a nasaksiak, adu 
a panangpasakit ti sinagabak, adun
nga edad ti nalabsak iti panagbiahek
ta no dadduma, adda panagamakko--
mariknak a kasla magangoak, kalpasanna,
mariknak manen panagsagibo 
ti ramut ti baro a biag kaniak.

Tinaraonak ida.
Namalbaliw ti biag
ket ammok nga agbiagakto--
no masibugan dagiti ramutmo kaniak.



RAMUT
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o4.2o12