Kas man kutkutiman ti lagip ket 'yegna't napalaus
Nga apal no subliasubliak daytoy nadaeg a lugar.
Lagip a kas man inturong ni gasat ti panagtumpong
Ti rikna-- naginnasideg, nagpinnereng dagiti mata
Nga awan kinaulbod wenno panaginkukuna
Ta inbuksiland ti kinapudno manipud kaunggan,
Nasukitko ti mensahe ti matam ken nakitak kenka
Ti essem nga iti pusok, diak nagawidan panagkulibagtongna
Pinerrengnak ket pinerrengka
Nakitak ti pakabuklam.
Apal a tunggal adda maimatangak a pareha
Nga agkuyog, agin-innangaw bayat ti pannagnada
Nga agkibin a mangunor iti napudaw a kadaratan,
Wenno agdigos sadanto agsinnuyat iti danum
Kas met di damota a panagpisaw iti baybay nga uray
Nalamiis ti danum, nakabarbara't panagrikna---
Ngem kasano nga iti ikikita ket mangparnuay
Iti panagpigerger ti lasag nga awan panangapros?
Ania aya ti adda idi nga agingga ita
Nga uk-ukisan ti panunotko?
Diak ammo no sika
Wenno nakunak kadi, "Agpisawta iti kadanuman,
Kalpasanna, agiladta iti kadaratan?"
Ngem ammok a nauksob dagiti kararuata
Iti dayta a rabii ta pinaneknekan
Ti panaglantip ti bagi
Sumeksek latta iti panunotko ti rekuerdo
Pinadalanak dagiti tugot a pinanawanta, ngem awan
Pagilasinan no sibibiagda pay. Nalbit, pinugas metten
Dagiti dalluyon ti iiyagepda iti aplaya iti tunggal sumipnget.
Ngem no bilang makabalikas la koma dagitoy a lagip,
Nalabit, adda namnamak a mangtunton ti naudi
A nagtakderan ken nangitunekan ken ayat
A dita ti nakaukasan ti gumilgil-ayab a rikna---
Ti umuna a linnaaw iti parbangon.
.
.
.
.
INBATIM TI LAGIP DITOY APLAYA TI MAKENA
[Erotiko a Daniw]
Rudy Ram. Rumbaoa
samiwengkenayatnirudy.blogspot.com
#ilokodaniw #lagip #aplaya #makena #maui #hawaii #kutkutiman #panagtumpong #perreng #kulibagtong #pakabuklan #kadaratan #sinnuyat #pisaw #pigerger #apros #lantip #nauksob #rekuerdo #agep #nangitunekan #naukas #erotiko #daniw #samiweng #ayat #rudyramrumbaoa
[Nabulod ti ladawan a nausar]
