PANAGBANIAGA [Panagtawataw]

Agbaniagaak kadagiti lugar

a diak pay napanan, kasarsaritak

ti bagik a kas man kasarsaritak ti billit,

wenno ti kaayan-ayat, wenno ti pinanawak nga ili,

ti bullalayaw wenno turod a kas man

kasasaok ti rinibu a banag---

ngem kinapudnona; awan.

Iti anatomia ti nakana a liday aglukat

a kas higante nga ensayklopedia

ken agrikep a di masinunuo a kas bulto

tapno matakaw ti misteioso a kallugong,

mairugi ti panagsusubang ngem ti rabii

agtalinaed dagiti sikretona a nakamboran

iti arak ken tubbog ti prutas ti panagsagaba

ken babawi, ket dagiti dadduma agsala iti tango.

Aggunayak kadagiti kurba a pagnaan ti dara

italmegko dagiti nagsarimaddeng a lalaem tapno

mangngegda ti musika, rummuar ti tubbog ti bagi

ket serkenna amin a bassit a lussok iti siudad, mangparnuay

iti simple nga ayug a mangtiliw ti atension ti lapayag.

Agbaiagaak kadagiti lugar a diak pay napanan

sadiay, awan ti nalawag a pagilasinan

ket amin a balonko imetna ti nagkaadu a saludsod:

Mabigbig ti pagdaliasatan babaen iti pagilasinan

ti maysa nga ayamuom wenno maysa a kinabanglo

kas iti kudil ti ay-ayaten; mabigbig ti maris ti mata---

ngem dinto pulos mabalingling wenno mapusipos...

.

.

.

.

.

PANAGBANIAGA [Panagtawataw]

Rudy Ram. Rumbaoa

Timpuyog Journal, Dis 31, 2o13

samiwengkenayatnirudy.blogspot.com

#ilokodaniw #timpuyogjournal  #panagbaniaga #panagtawataw #samiweng #ayat #rudyramrumbaoa

[Nabulod ti ladawan a nausar]

Realidad

NO agayatka, dika makaturog a mangpampanunot

ken mangar-arapaap iti ay-ayaten gapu ta ti realidad 

ket pudpudno nga amang ngem ti darepdep...

.

.

.

.

.

Ita Nga Aldaw:

REALIDAD

Rudy Ram. Rumbaoa

samiwengkenayatnirudy.blogspot.com

#itangaaldaw #realidad #samiweng #ayat #rudyramrumbaoa

 

KEYBOARDS SLIPPER

Duan ti naperdi a keyboards ti desktop kompiuterko isu nga imbes nga ibellengko, kastoy ti nagrehistro iti panunot nga inaramidko--

adda met gayam serbina, aya?

Ita, adda naidumduma a klase a tsinelasko. Hehe.

.

.

.

.

.

Ti La Adda

KEYBOARDS SLIPPER

Rudy Ram. Rumbaoa

samiwengkenayatnirudy.blogspot.com

#tilaadda #keyboardsslipper #samiweng #ayat #rudyramrumbaoa

TASA A PAGKAPPIAN

Kunada a saanka [kano] a makaturog no managkapeka. Hus! Diak patien dayta. Ti kinapudnona, isu pay ketdi, a, ti pangalak ti turogko aglalo no agpuyatak, piman.

Malaksid nga agbasaak pay iti kumporme dita no aguldagak a pangbannogko ti matak ken pangalak metten ti turogko. Ken maysa pay, agpayso a nasamay ti kape a kabadangan a mangarikap kadagiti balikas a kayat a gammatan tapno mabukel ti balabala ti suraten.

Ket gapu ta managkape datao ditoy pagtaengan ken uray iti trabaho, daytoy man ti nakursunadak a tasa a pagkappian-- kompleton, di ngamin? Adda pagigupan ti kape, adda payen pangikabilan iti biskuit, hehe.

.

.

.

.

.

Ti La Adda:

TASA A PAGKAPPIAN

Rudy Ram. Rumbaoa

samiwengkenayatnirudy.blogspot.com

#tilaadda #tasa #pagkappian #kompleto #samiweng #ayat #rudyramrumbaoa

REKUERDO

NAUKAGAK man daytoy ladawanmi iti dati a GF-ko nga itan kataktakunaynay iti biag. Ket no diak mariro, tartaraudi ti tawen 1980's wenno nasapa a 1990's a nailitak daytoy a ladawan.

Ah, rekuerdo!

SABALI pay a taldiap iti pananglagip, piman---

ti naikupinen a panid ti libro iti pakasaritaan ti biag ken ayat. Padasek manen a lukiben. Padalanak a lagipen, imutektekan ti linabagna nupay  adun a panawen-lam-ek, kuaresma, kalgaw, bagyo, arbis ken bisibis ti tudo a naibuyat ti tangatang iti panawen ken tiempo a naglabas---nabiagda laeng iti panunot, agpitpitikda iti puso, ken agay-ayusda a kas danum-ubbog a di pulos maatianan.

Ah, batonlagip latta dagitoy a rekuerdo ti kalman...

.

.

.

.

.

REKUERDO

Rudy Ram. Rumbaoa

samiwengkenayatnirudy.blogspot.com

#rekuerdo #daddumapay #lagip #taldiap #pakasaritaan #biag #samiweng #ayat #lukiben #imutektekan #linabag #barokenbalasang #kalman #monicarumbaoa #rudyramrumbaoa

Ita Nga Aldaw

SAAN laeng a masarakan ti napudno nga ayat iti perfekto

a tao ngem marikna met ti kinaperfekto a koneksion

kadagiti tao nga adda defekto ken pagkuranganna...

.

.

.

.

.

.

ITA NGA ALDAW

Mier. o7 Okt. 2o26

Rudy Ram. Rumbaoa

HM, Kahului

Maui

samiwengkenayatnirudy.blogspot.com

#itangaaldaw #daddumapay #napudno #perfekto #marikna #koneksion #defekto #pagkurangan #samiweng #ayat #rudyramrumbaoa

Ita Nga Aldaw

Ti napudno nga ayat

saan laeng a mangngeg

ti lapayag ken marikna

ti kudil-- rumbeng met

a makita dagiti mata...

.

.

.

.

.

ITA NGA ALDAW

Mier. o7 Okt. 2o26

Rudy Ram. Rumbaoa

samiwengkenayatnirudy.blogspot.com

#itangaaldaw #ilokodaniw #napudno #mangngeg #marikna #makita #kudil #mata #lapayag #samiweng #ayat #rudyramrumbaoa

DENGGEM [Pitik Nadagsen a Limdo 'Toy Pusok]

Denggem pitik nadagsen

a limdo 'toy pusok---

daytoy kadi a pait

ti saem ti iliwko kenka?

Pumusay met ti ragsak

iti naglukongan ti lima,

ket bayat apagdarikmat

a pannakisarang kaniak

ni patay iti patibulo, aniat'

banagen dagiti agrupsa

a kataltalonan a nalikmut

iti sipnget, napegpegges

kadi nga angin ngem

ti ut-ot a dumanon iti panunot?

Awan pagilasinan tagtagiurayek:

dagiti maidaton a sabong

kadagiti didiosen, ti alingasaw

ti kalgaw, ti galangugong

ti baybay, ti apaggilap

nga ilalabas ti layap iti tangatang,

wenno masiglotko ti lamiis

ti rabii, a banag koma

nga ilulutuadmo iti lagipko...

.

.

.

.

.

DENGGEM [Pitik Nadagsen a Limdo 'Toy Pusok]

Rudy Ram. Rumbaoa

samiwengkenayatnirudy.blogspot.com

#denggem #pitik #pusok #ilokodaniw #samiweng #ayat #rudyramrumbaoa

INBATIM TI LAGIP DITOY APLAYA TI MAKENA [Erotiko a Daniw]

Kas man kutkutiman ti lagip ket 'yegna't napalaus

Nga apal no subliasubliak daytoy nadaeg a lugar.

Lagip a kas man inturong ni gasat ti panagtumpong

Ti rikna-- naginnasideg, nagpinnereng dagiti mata

Nga awan kinaulbod wenno panaginkukuna

Ta inbuksiland ti kinapudno manipud kaunggan,

Nasukitko ti mensahe ti matam ken nakitak kenka

Ti essem nga iti pusok, diak nagawidan panagkulibagtongna

Pinerrengnak ket pinerrengka

Nakitak ti pakabuklam.

Apal a tunggal adda maimatangak a pareha

Nga agkuyog, agin-innangaw bayat ti pannagnada

Nga agkibin a mangunor iti napudaw a kadaratan,

Wenno agdigos sadanto agsinnuyat iti danum

Kas met di damota a panagpisaw iti baybay nga uray

Nalamiis ti danum, nakabarbara't panagrikna---

Ngem kasano nga iti ikikita ket mangparnuay

Iti panagpigerger ti lasag nga awan panangapros?

Ania aya ti adda idi nga agingga ita

Nga uk-ukisan ti panunotko?

Diak ammo no sika

Wenno nakunak kadi, "Agpisawta iti kadanuman,

Kalpasanna, agiladta iti kadaratan?"

Ngem ammok a nauksob dagiti kararuata

Iti dayta a rabii ta pinaneknekan

Ti panaglantip ti bagi

Sumeksek latta iti panunotko ti rekuerdo

Pinadalanak dagiti tugot a pinanawanta, ngem awan

Pagilasinan no sibibiagda pay. Nalbit, pinugas metten

Dagiti dalluyon ti iiyagepda iti aplaya iti tunggal sumipnget.

Ngem no bilang makabalikas la koma dagitoy a lagip,

Nalabit, adda namnamak a mangtunton ti naudi

 A nagtakderan ken nangitunekan ken ayat

A dita ti nakaukasan ti gumilgil-ayab a rikna---

Ti umuna a linnaaw iti parbangon.

.

.

.

.

INBATIM TI LAGIP DITOY APLAYA TI MAKENA

[Erotiko a Daniw]

Rudy Ram. Rumbaoa

samiwengkenayatnirudy.blogspot.com

#ilokodaniw #lagip #aplaya #makena #maui #hawaii #kutkutiman #panagtumpong #perreng #kulibagtong #pakabuklan #kadaratan #sinnuyat #pisaw #pigerger #apros #lantip #nauksob #rekuerdo #agep #nangitunekan #naukas #erotiko #daniw #samiweng #ayat #rudyramrumbaoa

[Nabulod ti ladawan a nausar]

Dagiti Puted a Daniw

UMUNA nga apros iti seradora, agan-annadak

In-inutek nga ipuligos, dakulapek a naimbag

Ta uray kunam a nakakandado't nabayag

Siak ti umuna a sumrek, siakto ti nagasat

KUNAM iti damo: Adda mabati a marka iti pagserkan

Kunak nga insurnad: Dika madanagan siak 'tay natanang

Kunam nga inulit: Dinak allilawen ket dika agsamsam

Kunak a silalailo: Dinak pengdan ta kuak ti kinabaknang

Nagkinnarawata't panunot, natiliwak balikas

Kasda la naamo a karnero nagkurnoda't arpad

Ngalisto itan nga iyusong kakaisuna a tulbek

Awanen ti sawsawir urayko la nga ipennek!

.

.

.

.

.

Naadaw iti maysa a paset ti daniw, RIDAW,

ken karaman ti libro nga Alimpatok, Antolohia Dagiti Erotiko a Daniw nga Ilokano

Rudy Ram. Rumbaoa

samiwengkenayatnirudy.blogspot.com

#putedadaniw #ilokodaniw #ridaw #alimpatok #antolohia #erotiko #daniw #samiweng #ayat #rudyramrumbaoa

[Nabulod ti ladawan a nausar]

Dagiti Puted a Daniw

PINALAGIPANNAK iti naminsan umar-arubayannak

Pinawilannak umasideg iti inaladam a bambantayam 

Diak ipilit ti sumrek iti kinabukatot a wagas

Ta ibilangnak a gangannaet-mannanakawak

PINALAGIPANNAK nga adu't naggandat a sumrek

Dida nagballigi ta awan kadakuadat' tulbek

Ngem no bilang palubosam, lumaemak

Lanaak ti tulbek tapno nagalgalis a sumrek

INULITMO ket pinalagipannak pay a kunam

No ipilitkot' sumrekadut' pannubok a paglasatak

Ngem diak samirenno isut' pagayatam

Natakneng nga iseserrek, napudno 'toy gandat...

.

.

.

.

.

Naadaw iti maysa a paset ti daniw, RIDAW,

ken karaman ti libro nga Alimpatok, Antolohia Dagiti Erotiko a Daniw nga Ilokano

Rudy Ram. Rumbaoa

samiwengkenayatnirudy.blogspot.com

#putedadaniw #ilokodaniw #ridaw #alimpatok #antolohia #erotiko #daniw #samiweng #ayat #rudyramrumbaoa

[Nabulod ti ladawan a nausar]

Maika-Sangapulo a Bulan ti Tawen

ADDAKA met gayamen. Ammok a simmangpetkan ngem dika la inintonaran. Idawatko a sapay koma ta ti kaaddam ita kaduam dagiti adu a parabur ken pagimbagan ti kaaduan.

Ala wen. Dumanonka, OKTUBRE!

.

.

.

.

.

Maika-Sangapulo a Bulan ti Tawen

Hue. o1 Okt. 2o26

Hardin ti Wailuku

Maui

Rudy Ram. Rumbaoa

samiwengkenayatnirudy.blogspot.com

#oktubre #itangaaldaw #maikasangapuloabulantitawen #samiweng #ayat #rudyramrumbaoa

Dagiti Puted a Daniw

Di napupuotan ti panagtapaw ti rikna

Iti adayo a lugar a dita ammo no ania,

Ngem agsisinniglot ket masukdal dagiti lagip:

Umuna ti init, sumaruno ti bulan-tipping

Uray pay dagiti bato, naggunayda.

Amin a banag, makita. Marikna---

A duduata ti mangiluklukaib...

.

.

.

.

.

Naadaw iti maysa a paset ti daniw

MAYSA A KALGAW

Ken karaman iti libro nga Alimpatok, Antolohia Dagiti Erotiko a Daniw nga Ilokano

Rudy Ram. Rumbaoa

samiwengkenayatnirudy.blogspot.com

#ilokodaniw #putedadaniw #kalgaw #nagtapaw #sinniglot #masukdal #lagip #naggunay #antolohia #erotiko #samiweng #ayat #rudyramrumbaoa

[Nabulod ti ladawan a nausar]

Dagiti Puted a Daniw

Agsaoka't napigsa tapno maawatan; uray nangatot' timekmo

Napigpigsa a panangibalikas uray no daytoy ket saan a pudno.

Ngem saanen a nasken, awan ti mangaw-awag iti naganmo,

Nagpiestaan ti kulibangbang ti rabii dagiti wara a sapatos,

Ket iti panaglabas ti panagrurunos ti narakrak

A pasdek, nairuar iti dalan dagiti natadtad a bara...

.

.

.

.

.

Naadaw iti paset ti daniw, DUAYYA

Rudy Ram. Rumbaoa

samiwengkenayatnirudy.blogspot.com

Naipablaak iti Bannawag Magazine, Abril 16, 2o12 Isyu

#ilokodaniw #bannawag #duayya #balikas #nagpiestaan #kulibangbang #rabii #narunos #rakrak #natadtad

[Nabulod ti ladawan a nausar]

Dagiti Puted a Daniw

Agarup amin a banag iti dayta a kanito

Ket nagluom ken matnag

No dadduma, agumentar ti pul-oy

Ti angin ket pagsalaenna

Dagiti tawa--aglukat sa maitangep.

Ngem naglamiis ti rabii ket timpuar

Dagiti nakarimrimat a bituen iti tangatang

Kas iti karimat ti naabbongan a pingping,

Ket ti barukongmo kasda la kigaw

Iti itutumpuarda iti lawag ti sellag a bulan

'Yarig dagiti kulintaba a lirio a maayatan...

.

.

.

.

.

Naadaw iti maysa a paset ti daniwko, MAYSA A KALGAW,

ken karaman iti libro nga Alimpatok, Antolohia Dagiti Erotiko a Daniw nga ilokano

Rudy Ram. Rumbaoa

samiwengkenayatnirudy.blogspot.com

#ilokodaniw #maysaakalgaw #nagluom #natnag #agumentar #puloy #timpuar #nagrimat #abbong #kigaw #sellag #kulintaba #lirio #alimpatok #erotiko

#rudyramrumbaoa

[Nabulod ti ladawan a nausar]