INTURONGNAK kadagiti bantay
ken dagiti nakaun-uneg a teppang
ti napintas a buya ti panagtennag
ti danum iti dissuor nga agturong
iti sentro ti lubong, Ken wen,
nagalinggagetak gapu't butengko
dagitoy a teppang a pumada iti amin
a misterio---pagsiddaawan, ngem
nakaay-ayat ti kinadatdatlagda.
Ket ti kasumbangir a teppang
ti nalawa a bariwangwang,
naunnatda a kas iti lubid ti arpa
a maipalladaw iti bantay a kaarngi
ti rangtay a pagdaliasatan a maisilpo
iti agpada a sikigan dagiti teppang;
gapuna a nairut ti galut ti nabara
nga arakup ti panagpagayan kalpasan
a natupakan no mano a tawen ti nalawa
a giwang tapno maikkan gundaway
nga agsarakta ti daytoy nga aldaw
iti asideg ti karayan, iti asideg ti atep
ti lubong tapno 'yawatmo dagita ima
ket kunam: "Umayka, isurok kenka ti agsala."
.
.
.
.
.
Naadaw iti paset ti daniw "Nakakaskasdaaw"
Rudy Ram. Rumbaoa
samiwengkenayatnirudy.blogspot.com
#itangaaldaw #ilokodaniw #putedadaniw #nakakaskasdaaw #inturong #bantay #teppang #dissuor #danum #agturong #nagalinggaget #mistero #datdatlag #kasumbangir #bariwangwang #lubidtiarpa #pagdaliasatan #sikigan #nairut #galut #panagpagayam #giwang #gundaway #ateptilubong #isuro #agsala #samiweng #ayat #rudyramrumbaoa
[Nabulod ti ladawan a nausar]
No comments:
Post a Comment