NO dadduma, dimo mailawlawag
Ti kaunegan a debosion nga ar-aramidem;
Dagiti sakripisio ken panagibtur a kas man
Awan pagnguddoan, awan panagbukbukod
Aramidem amin a pagsayaatan ti familia
Ken no mabalin awan sikreto, dimo ipalubos
A marpuog ken mayadayo ik-ikutam a kinaanusmo
Naasika ken sindadaan a mamakawan
Kadagiti biddut a naaramid. Saanmo ketdi
Padpadasen ti mapaay uray no mapuris
Ti pusom ken marikna apges ti sugat
A kasla saggaysa a mapirpirsay ti pasetna;
Mamatika ket mamatikanto latta
Iti labes ti nagkaadu a pannakasuotmo
Nga adda balligi a magun-odmo
Iti nakiro a lubong a paggargarawan
Nga isut' karaniagan nga andap a makitam
Kenka kadagiti amin a napipintas a banag
A makita bayat ti panagbiagmo
Ken manmano a maaprosan dagiti napateg
A klasena a bato a kas iti diamante,
Balitok wenno pirak, ngem ti ayatmo, Ina,
Saan a gangandiong, saan a peke
No di ket pudno a naibaklay kadagiti abaga
Nga akmen a responsibilidad ta amin dagitoy
Nalablabes pay ngem ti itudo a pagrebbengan
Nga ayat ken dungngo bilang Ina ta karitenna
Amin a pannakailawlawag iti tunggal makita,
Maaprosan ken marikna ngem agtalinaed
A sikreto a kas iti misterio ti nakaparsuaan
Ken kas ti kinadayag ken kinangayed
A milagro a saanto pulos maawatan ti tao
Ti kaipapananna---ta maysa daytoy
Nga ebidensia a pagsidsiddaawan a kaasi
Ti Dios iti panangibagnosna ti lubong.
.
.
.
.
.
AYAT [TI MAYSA NGA INA]
Rudy Ram. Rumbaoa
samiwengkenayatnirudy.blogspot.com
#ayat #ina #kaunegan #debosion #sakripisio #panagibtur #pagsayaatan #familia #kinaanus #sindadaan #mamakawan #mamati #pannakasuot #balligi #magunod #andap #makita #napateg #klasena #diamante #balitok #pirak #gangandiong #naibaklay #abaga #responsibilidad #nalablabes #pagrebbengan #karitenna #maaprosan #misterio #nakaparsuaan #kinadayag #kinangayed #milagro #pagsidsiddaawan #dios #panangibagnos #samiweng #rudyramrumbaoa
[Nabulod ti ladawan a nausar]
No comments:
Post a Comment