AGRAG-O, agragsak ta nadanonan manen sabali a pangal ti biag!
Mayo 4, dimo lipatan-agyaman iti Dios. Agyaman kadagiti amin a bendision a naawat. Naragsak a panangrambak iti aldaw ti panagtao Sika a dati a gayyem, kaayan-ayat ngem kataktakunaynayko ita iti biag nga agnanayon!
IMPALAIS ti angin ti isemmo kaniak
Nariknak dingpilna iti pingpingko
Bayat a naggilap ti kalman iti lagipko--
Ti nagrugian ti pakasaritaan
Ayat a nasudi nga inil-ilalaan
Kitaem, naglanga a kristal
Ti nasapa a bigat. Kaduam
Ti angin, kaduam ti init,
Kaduam ti bulan. Maysaka
A datdatlag kadagiti matak
Inton rabii, agtugawka
Iti nalinak a danum
Ti refleksionko. Inton rabii,
Denggem ken bilangem
Ti ritmo tunggal pitik
Ti pusok ta mayarigka
A kas mannanakaw
Nga agsamsam ti kinabaknang--
Kukuam tunggal angesko,
Ti bagi ken kararuak
Nupay kasta, addaka latta
Kadagiti palayupoy ti angin
Iti rabii. Kenka ti kinatalinaay
Nga uni, maysa a perfekto
A baludmo tunggal garawko
Sika ti baybay, kenka aglangoyak
A sitatalek. Tengngelmo tunggal
Sabbuag dagiti allon, dinak baybay-an
A malmes, idanonnak iti takdang.
Aywanam, dimo ipalubos
A masugatak iti aniaman
A pakadangrak ket yadayonak
Iti nakana a leddaang-- ket
Ti apges a mariknak,
Umay agpaeng iti pusom
Isut' gapuna maysaka a linglingay--
Sika ti isem, sika ti apuy, sika ti amin
Kadagiti kangrunaan a makita dagiti matak
Sikat' pakabuklan ti napintas a darepdep
Dagiti amin a matagtagainep. Mabalin a Sika
Ket Siak. Mabalin a Sika ti Siak--ti pinagsilpo
Ti gasat "Agingga a patay ti manggudas kadata!"
.
.
.
.
.
SIKA
[Kenka Monica]
Rudy Ram. Rumbaoa
Lun. o4 Mayo 2o26
Wai, Maui
samiwengkenayatnirudy.blogspot.com
#itangaaldaw #mayo4 #aldawpanagtao #naragsakapanagkasangay #kablaaw #sika #ilokodaniw #agyaman #bendision #naawat #dios #sabali #pangal #biag #samiweng #ayat #rudyramrumbaoa
