Rupa

[Nabulod ti ladawan a naaramat]




Napintas 'toy aruatek
Komportable a naabel
Iti dutdot ti karnero,

Ti Diosko addaan
Pagarian, ngem dagitoy
Kadaraak, agkatangkatang.

No agsaoak, aggaraw
Kas iti panagaskaw
A maikontar iti tunggal segundo

Ti nalamuyot a pingpingko
Saan nga agdisso kenkuana
Gemgem asinoman nga aginlalaing.

Awan wasay ti Diosko
Ngem ayat ti wasayna
Ket adda iti rupak

Ti ay-ayatek, makaay-ayo
Nagaruat kas maysa a dayag
Isut' mamagpitik iti pusok.

Ti Dios taraonannat' pamiliana
Ti kadaraak pinugsatdat' urat
A mamagsilpot' kamengna,

Nagtaeng naimbag a sursuro
Uray 'yulbod diak koma kayat
Ammok dagiti manglimlimo.

Kinapakumbaba a langat' maladaga
Makaguyugoy, ngem nataengan rupa
Kadaraak gaput' edad ken kinagamrud,

Masulnot ngipen iti ngiwat
Mata ken dila, saanko a kasapulan
A pagbayad kadagiti utang

Ngem kasapulak ketdi ti rupa
Nga aglanglanga a kas kaniak
ta saanko a kaing-ingas ti rupak.

Ti Diosko, saanna a kasapulan
Ti rupak, ngem ti kadaraak
tinagikukuada ti rupak--


Uray pay bosesko,
Pinagpukawda iti tangatang...





RUPA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[CR/RRR.o1.2o13.Maui