[nasurat idi 02.12.06]
apaman a mabasam
'toy a daniwko,
inaramidkot' rabii
nga agsulsulo...
malmaldayak piman
mapukaw a dagus ti ragsakko;
malaglagipko laeng,
kaaddak idi dita sibaymo...
no iti malem
ti init diay laud lumneken...
ibus-oyna ti maudi
a lawagna ditoy lubongen,
agkarayam ni iliw
dagus a rumuarak metten;
ta sapulenka ti kunak,
ngem awanka met laeng...
o, ayat,
idadanesnak man laeng...
mangliwengliweng a kalman
ipalagipna laeng,
anasaaska pay
iti aglawlawko sensennaayendak;
supapak amin dagitoy,
iti panangbaybay-am kaniak...
lagipmo,
umayda laeng kaniak...
awanka man a makitak
ngem kasla addakat' dennak,
adu a kari
ngem anian a ranggasmo kaniak;
dinalapus ni dawel,
dagus nga innak linipat...
o, ayat,
siak idi ti samsam-item...
nagbalinak, aya,
apagbiit inka papaiten?
o, ayat,
binaybay-annak laeng,
nagturedkan, aya,
dinak man bitibiten!
[copyright 2006 by rudyram.rumbaoa]
2 comments:
I am grateful for your created site, I like it a lot! Agyamanak gayyem!!
Atienennn, thanks met 'giem iti panagpasiarmo ditoy nanumo nga abong-abongko. ala, kanayonem latta ti agpasiar saan la a ditoy Samiweng ken Ayat, uray pay ti dadduma a website ko.
manen, agyamanak!
Post a Comment