Samiweng. Daniw. Sarita. Salaysay. Damdamag, Kdpy.

Nov 5, 2017

Kunak Man...


[nabulod ti ladawan a naaramat]


"dimo ipalubos nga iggaman
  ti sabali ti plumam
  tapno laeng isuratda ti pakasaritaam..."


-kunak man
 rudy ram. rumbaoa
 dagiti koleksion a daniw, sarita, kanta ken dadduma pay
 www.samiwengkenayatnirudy.blogspot.com

Oct 29, 2017

Kanta ti Pannakailiw

[Nabulod ti ladawan a naaramat]

Ammok a nalipatamon ti naglabas
Ngem dimo koman lagipen pay
Saankan nga agsurat kaniak
Kas iti inaramidmo idi nga aguray.

Rebbaem man amin a rangtay
Ken dagiti kalsada a pagdaliasatak
Ngem ti maysa a nadarat a dalan
Ibatim kaniak, idawatko; ilalaak.

Ket iti labes dagiti nalawa a taaw
Atiddog ken adayo dagiti pagkamangan
Ti kayo ti aruo innak ipakpakaasi
Bay-am, agpallayog iti aldaw ken rabii.

Agpukawto man amin a kataltalonan
Marabnos kinabirhen ti kabakiran
Ngem dayta bassit a kayo ti aruo
Palubosam a dumakkel iti langit tumokno.

Kadagiti amin nga innak ilalaen
Uray kunam a mabalinmo a tagikuaen
Ti rangrang ti init ken lawag ti bulan
Agkudrep, lamuten sipnget ti masakbayan.

Agpullikawka a kas iti teggaak
Ket panawannak iti nakana a liday
Ngem ti ayat, ti kakaisuna nga ayat;
Dawatek, ipalubosmo a mabati kaniak...



KANTA TI PANNAKAILIW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]02.14.2012.maui









  

Oct 17, 2017

Ti Lubong

[Nabulod ti ladawan a naaramat]

Nagbayanggudawak iti adayo 
ken nalawa a di masinunuo 
a gangannaet a disso, 
nagkallautang ti riknak 
iti rugi ti law-ang ingganat' 
makita ti mata; nangngegkon idi
nga awan pay nagdaliasat 
ti daytoy a kalsada- ti dalan 
a nagpagnapagnaan-napanantay' idin,
dalan nga awan ungto ken pagsublianan.

Datayo ti padron nga imahe
ket dagiti ari isuda ti amo,
ti akto a pasamak ken kinapudno
saan a pangngarig ken panagdasig;
ta adda tiempo nga aggunaytayo
a nawaya iti entablado, agsublisubli
nga agparang tunggal maysa
iti kahon ti pannakalipat.

Anian a nagatiddog ti tiempo
a naited kadatayo ket agbanag
nga agnanayon ti agtaruptop
a lubong, no di agparang
ti nagan wenno pagilasinan;
ket no adda pagkurangan,
saantayton agsubli iti dati.

Ket iti rabaw ti lubong,
makitak dagiti nargaan
ti turogna, iti kapitakan,
makitak dagiti napapanaw
a kasla billit a nabuak
nga agtatayab kadagiti pagtaenganda:
no mayadu ti panagpanunot
ti kinaawan-kaeskenan
a pannakalipat, makitak laeng
dagiti pumusay ken di naipasngay.

Ngem daytoy ti kaduogan a posada
wenno pagdagusan a maawagan
iti lubong, daytoy ti paginanaan-pagtaengan
ti rabii ken aldaw: daytoy ti sobra
a padaya dagiti ginasut nga ari,
tanem a mayarig ti siled
ti hotel dagiti ginasut a politiko.



TI LUBONG [The World]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com

Oct 1, 2017

Ammok ti Awan [Ana Ngarud ti Ammok?]


Paaduen ti langit
ti dalig ti kinaawan-anag
a yuumayko, mangdegdeg
dignidadna ti ipapanko;

wenno nangeg ti asinoman
ti bosesko no apay
a nasken nga addaak
ken no apay a mapanak.

Ngem no dinak sangpetan
ti pusok a mangsolbar
ti burburtia, diakto
magun-od ti gandat
ti kinapatama a panangsapul;

aramidek dagiti banag-
ti kopa ti arak ti Nirvana,
ta mabalin a di sumangbay
ni ragsak kalpasanna.

Ket no koma laeng maiggaman
ti pusok ti kaipapanan ti biag,
iti ipupusay maammuak
ti misterio ti Dios;

iti daytoy nga aldaw a tagikukuak
ti bagik, ammok nga ammok ti awan.
Inton bigat no panawannak daytoy
a pagtaengak, ana ngarud ti ammok?



AMMOK TI AWAN [ANA NGARUD TI AMMOK?]/I Know Nothing [What Will I Know?]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com



Sep 21, 2017

Nagpukaw ti Panunot [Ken Kinasiribda]

[Nabulod ti ladawan a naaramat]

dika agladingit, filipinas,
iti lubong a nautoyan ti bannog,
adda kenka ti tartarigagayam
dika palugodan bagi a marnek
iti awanan-panggep a leddaang.

gapu ta saan a nalawag
no ania ti adda ken awan,
agragsakka, dika malday
iti nalpasen ken di pay narugian.

petpetan ti dakulapmo, filipinas,
ti amin a palab-og nga iggem
ti lubong, nagrutingen kinaberde
ket masay-op banglo iti hardinmo;

iti maysa a rabii agtugawka
a kas linnaaw kadagiti minuyongan
agingga a purosem isisingising
ti baro a panagbannawag.

mamaliw dagiti pumusay
agbalinda a lubong ken tapok,
maisina ti maysa iti sabali a kas 
iti balikas nga awan kaibatoganna;

'nia aya ti arak a nainum
ken nakabartekanda ta agingga
iti aldaw a pannakaukom nagpukaw
ti panunot ken kinasiribda?


NAGPUKAW TI PANUNOT [KEN KINASIRIBDA]/Lost Consciousness [And Knowledge]
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com

Aug 15, 2017

Kunak Man...

[Nabulod ti ladawan a naaramat]

Wen, dakkel maaramid ti musika.
No aglayag iti ere, agbalin daytoy
a komunikasion a mangidanon
ti ramen ti mensahe...


Kunak Man
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com




Jul 30, 2017

Kunak Man: Panangduktal


[Nabulod ti ladawan a naaramat]


Ni kaano man saan
a pulos nga ibutaktak,
ilatak ken irakurak

ti mabasa a libro
ti mamimpinsan a daras
dagiti naimbag, dagiti nasayaat,
linabag ken amin a sikreto, balabala,
naguneg ken naikur-it
a balikas a linaonna-

adda ketdi kenka a mangduktal.


kunak man
rudy ram. rumbaoa
www.samiwengkenayatnirudy.blogspot.com





Jul 16, 2017

Tugot

[Nabulod ti ladawan a naaramat]


Agngudonton ti tawen
ket maulit manen a mairugi,
agnasanas ilelennek ti init
kas iti kalman; ngem yegnat' maysa 
a banag kas iti kapreskot' angin nga angsen-
ngem yarasaasko kadagiti kayo ken bulong
dagiti agdama a balabala ti pakasaritaan
ken pagbiagan, ngem maispaldanto ngata
nga agserbi a pakaadalan ti sumaruno 
a kaputotan, wenno nalabit a mabati kadi lattan
a kas maysa a tugot a minuli ti bukodna
nga anniniwan nga alisto a mapunas?


TUGOT
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com



Ubbaw

[Nabulod ti ladawan a naaramat]


Sinapulko ti masakbayan idi kalman
ngem nakitak ti nakusso-kusso
a kasasaad a pagbibiagak iti agdama-
mapnekak a makaammo ti awan...


UBBAW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com


Jul 9, 2017

Baro a Namnama

[Nabulod ti ladawan a naaramat]

kadagiti kawaw
a panawen
ti panagraira
ti buteng ken patay;
nainawka
iti saklot ni dawel
natagibi
dagiti sardam nga umel

inkam' naguray
nargaan a turog
immapay
naduayyakam'
iti tiempo a naunday,
lunod ken tuok
inkam imbaklay
a nangpadaan
inka isangbay

ngem idi,
ti namnama agpukawen-
limtuadka
kas maysa a bituen
a mangsilnag
agkurkurayawen
a demokrasia ken pagilian
nga aglikigen

baggakka ti daya
prinsipe ti kappia
puso a maldaangan
inda maliwliwa;
ket ti saibbek,
dung-aw ken saning-i
nasubadanen
iti rag-o ken dir-i

anian a nagsam-it
mangnanam wayawaya
pudno a kaipapanan
ragsak ken talna;
dita saklotmo
italekmi kenka
masakbayan
ti ina a daga...


Baro a Namnama
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
Immuna a naiposte iti Iluko.com.Nobiembre2006
www.samiwengkenayatnirudy.blogspot.com


Jul 5, 2017

Dinto Maumag

[bukod nga ala a ladawan usar ti IPhone 6 Plus]

Sapulek kinaulimek 
dagiti sardam, arakupmo
a bang-ar 'toy riknak
ladawam inikutan-kinupikopak
mangep-ep dagensen 
isut' ragsak

Padasek agsubli 
no napukawen puris
a naipalay-naitanem 
ditoy barukong
ket iti murdong ti maipalais 
a rabii, sapulekto pay maminsan
dagidi lamma nga imbati ni ayat

Wen, dinto maumag 
ti lagip iti panunot
ta gumil-ayab bara 
ti pammateg ket padasekto manen 
a silmutan pabelo ti napalabas
tapno mabiag iti kaunggan
dagiti umel a panawen...


Dinto Maumag
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
Immuna a naiposte iti Iluko.com idi Disiembre 2006
www.samiwengkenayatnirudy.blogspot.com

Jun 23, 2017

Agyamanak

[nabulod ti ladawan a naaramat]

agyamanak ti panagsublim iti panagmaymaysak
saan a gapu ti kaadda ti salugsog iti nakem
adda ketdi imbatina a batonlagip a pakalaglagipak-

wen, saanmo a basol ti nagbiddutam
ta di marikna dagiti saan a makaawat,
ngem adda ketdi agur-uray a karit a mangtakuat
dagiti saludsodmo a kayatmo a masungbatan.

agyamanak ti panagsublim iti rupam nakitak
naisangsangayan a pintas saan a mayebkas,
adda rimat dagita matam nasarangsang katawam
iti rinibu a milia a kaadayo nagsublika't arpad.

iti kaaddam kaniak padasek nga isapulan
ti di mabilang a saludsod tapno masungbatan,
saan a gapu ti kaadda ti salugsog iti nakem
pukawen sainnek barukong tapno aggibusen.

agyamanak ti panagsublim iti panagmaymaysak
saan a gapu ti kaadda ti salugsog iti nakem-
maipasngay sabali a biag iti kaaddam kaniak.



-rudy ram. rumbaoa
 agyamanak/immuna a naiposte iti iluko.com idi enero 2006
 dagiti koleksion a daniw, sarita, kanta ken dadduma pay
 www.samiwengkenayatnirudy.blogspot.com

Jun 20, 2017

kurdapya

[Nabulod ti ladawan a naaramat]

ay wen, kurdapya, pumanawka
iti sidongko dinak singaen, ala,
ta nabayag idin a sisiimenka
napukawen anus ken pasensia.

wen kurdapya, adaywannak, ala,
tapno mabang-aranen 'toy rikna;
ibagam idi a sabidongak kenka
waswasemon ti nagkinnarianta.

diak dagmel tapno ikutannak latta
tapno bukodam ragsak a dimo kukua,
diak met bulsek tapno diak makita
aramidmo a paggaayatan dadduma.

no kunak, adaywannak, kurdapya,
ta ginibusakon ti relasionta
uray naglaplapunosan ayatko kenka
ibabawik itan ta dinakon kukua.

imbagam idi a siak ti samsam-item
gayam nagbalinak nga inka papaiten,
no koma ammok a kastoy nagbanaganna
diak pinagbayag daytoy ayan-ayatta.

ita ta nasapa pay, kurdapya,
adaywan, panawannak kunak kenka,
tapno di agleddaang pay 'toy riknak
ken diak ay-ayen di agbalin a gasat.


-rudy ram. rumbaoa
 immuna a naiposte iti iluko.com, aug2006
 dagiti koleksion a daniw, sarita, kanta ken dadduma pay
 www.samiwengkenayatnirudy.blogspot.com

Jun 18, 2017

Ti Kunada...

[Nabulod ti ladawan a naaramat]


Iti Daytoy Nga Aldaw...

Kuna ti dadduma a saan [kano] a kas iti pannakarambak ti Mother's Day ti kinaimportansia ti pannakalagip/pannakaselebrar ti Father's Day. Hmm...diak ammo no apay a nasaoda ti kasta. Ngem no abisigentay' a naimbag, biddut daytoy a panagipapan.

Ti panangrambak ti aldaw dagiti amma ken inna ket agpada nga importante kadatayo nga annak tapno maipalagip no asino ken no ania ti akem dagiti nagannak iti inaldaw a panagbiagtayo, [wenno daytoy] ti wagas a panagyaman [kadakuada], panangrespeto, panangpatalinaed [linnangen wenno panagkikinnamayet] ti kinaurnos ken kappia ti tunggal kameng ti pamilia. Tunggal maysa kadakuada, adda bukodda nga akem nga iserbi iti pamilia ken kadagiti annak.

Isu mammet a naikkanda ti bukod a pannakalagip/pannakaselebrar nga aldaw.

Kas pagammotayo, ti ina isu ti silaw [wenno lawag/rangrang] ti pamilia, idinto ti ama isu ti teddek wenno pondasion a nakaikumitan ti responsibilidad [kas ti panagdesision kadagiti banag nga importansia iti pagsayaatan wenno masakbayan ti pagtaengan nga idauloanna]. Agpadada nga ari ken reyna ti pagtaengan.



Ket no bilang mapundi ti bombilia [silaw], saan kadi mabalin a masuktan? Amman. Ngem no ti teddek [pondasion] ti marebba, matuang ti pagtaengan. Matnag dagiti alikamen. Maparalisado ti sibubukel a pagtaengan.


Ngem aniaman ti agbalin nga akem dagitoy dua a mangidaulo ti pagtaengan, agpada ket agpadadanto latta nga importante iti pagsayaatan ti pamilia ta isuda ti mangbalanse saan laeng a pannakataraon dagiti annak no di pay ket ti pannakaiwanwan ken mangbayabay kadakuada - [espiritual, pisikal wenno pinansial man a banag] bayat ti panagdakkelda iti nakiro a lubong a paggargarawan.


Naragsak a Pannakarambak ti Aldaw Dagiti Amin nga Amma. Agbiagkayo!



-Rudy Ram. Rumbaoa
 Ti Kunada: Iti Daytoy Nga Aldaw
 Wailuku, Maui, 18 June 2017

Jun 7, 2017

Ti Ladda: Ibukiradmo


ibukiradmot' petalom
ita a rabii, say-opek
banglo nga umayamuom
bareng kunak maliwliwaak
panagsensennaay-panagmaymaysak


ti ladda
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com

A Day in a Life/Then Life Happens: Something to be remembered by...


May 30, 2017

Kunak Man

[Nabulod ti ladawan a naaramat]

"Paggaayat a riknaen
ti ramay ti bukodna a kudil
tapno marikna ti itdenna 
a sensasion kalpasan
ti panangaprosna ti espira ti lirio..."

Kunak Man
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com


May 29, 2017

Kunak Man

[Nabulod ti ladawan a naaramat]

Fingers love to feel
themselves after touching
the spire of the lily...


Kunak Man
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com

A Day in a Life/Then Life Happens: Mate

"Lone butterflies meet;
flutter wildly...and then mate
on the last spring breeze"

"Nagsarak ti dua a kigaw a kulibangbang;
napigsa ti uni dagiti payak nga agpayakpak
kalpasanna, nagasawa iti panawen
ti angin a makapasalibukag iti rikna
a tartaraudi ti panagrurusing...


A Day in a Life/Then Life Happens: Mate
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com]

May 28, 2017

Kunak Man: Ipapanaw

"Iti panangrugi ti umuna
a bisibis ti tudo, 
agalumanay ti uni
dagiti petalo iti ipapanawda
ti panawen-panagrurusing..."


Kunak Man
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com

May 6, 2017

Ti Ladda

[Nabulod ti ladawan a naaramat]

Makaisemak man ti kuna ni baket.
Nalabit, mabain la siguro a mangipudno
a "red flag is up."
Di kad mari-schedule manen, a,
hekhek!


Ti Ladda
Rudy Ram. Rumbaoa
www.samiwengkenayatnirudy.blogspot.com

Kunak Man


[Nabulod ti ladawan a naaramat]

"Mamatiak a saan nga alisto
a mapukaw wenno matay
ti panagrikna wenno sensasion
gapu ta kanayonda
a mataraonan iti rekuerdo..."


Kunak Man
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com




May 3, 2017

Kunak Man


"dagiti daniwko naisuratda dita pusom,
ti kantak para iti kararuam ket ipalagip
dagiti ladawan ti napalabas tapno agnanayon
nga agtaeng ti rekuerdo iti panunot...


kunak man
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com
repost-05.03.2017
copyright.01.26.2015