Dungdungngoek Nga Ina [Ken ni Adelindes]

[Adelindes Ramos Rumbaoa]

Nupay saan a sika ti nangborda
Ti pagan-anay ti maysa a santa
Ngem ti apros ti imam, nagtaengka

Iti pagtaengan a maibilang a kukuam.
Saanka met a nagsurat iti daniw
A mangkritikar kadagiti galad ken arte,

Ngem nanumo dagiti sirmatam
Ket iti pusom nakipagbiagda kenka.
Nangruna a saanka a nangyukit,

Wenno nagdisenio kadagiti marmol,
Ngem Sika ti kalaingan nga eskultor
A nangsukog kinataok nga adda ita kaniak.

Awan binangonmo kadagiti establisimiento
A daydayawen koma dagiti tao iti naglabas
A tiempo- ngem ti pintas, garaw ken linglingay

Nga impakitam, asidegka iti sidong ti Dios.
Adda man kaniak ti sagut ni Santa Claus,
Wenno inted a pakalaglagipak dagiti kakabsatko-

Siakto latta ti siak a nanumo a bunga ti ayan-ayat
Ket ti laeng dungdungngoek nga Ina ti ipangrunak!





DUNGDUNGNGOEK NGA INA
[Ken ni Adelindes]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma pay
www.samiwengkenayatnirudy.blogspot.com
[cr.2o14]