 |
| [Nabulod laeng ti ladawan a naaramat] |
ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
Baklayem kadi manen, Juan,
Ti kalbaryo nga ipabaklay kenka
Dagiti buklaw a berdugo;
Ngem bari-bari isudat' pilim
A mangituray ket sapay
Ta dikanto koma agbabawi.
Ti bileg ti politika kas iti birtud
Dagiti manggagamud,
Naamoda kadagiti napusasaw
A kari; gundawayanda ti kinalupoymo
Ta nasikapda nga ikasaba
Ti dakes a panagem, dagiti pasuksok,
Inuugma ken manglimlimo a kinatao
Banag a pakaabakan
Ti pangngeddeng ken prinsipio.
Wen, baklayemto kadi manen, Juan,
Kas iti panangibaklaymo iti naglabas
Ti nabantot a kros dita abaga
Dagiti ar-artiok ti natadem a dila
Nga isut' nakaallilawam, nagkurnoam?
Ngem siputam ta kas iti panangipug-aw
Ti asuk ti sigarilio, kasta ti kaalistot'
Panagpukaw dagiti diskurso ti ngiwat
A napno't ilusion ken igges a mangimas
Ti gita iti di mapnek a tarigagay
Ti panunot ken lasag-
Ket dimo ipalubos a payagos 'ta riknam
Iti kinadoble-kara ti rupa dagitoy a buaya
Ta adda met laeng kenka a mangiliklik
Iti panangsikbabda ti kalikagumam
A mamuli a masakbayan, sikat' agdesision:
Ikur-itmo ti namnamaem a makatulong iti pagilian!
No comments:
Post a Comment