Sika [Ti Preludio]

[Nabulod laeng ti ladawan a naaramat]

Sika [Ti Preludio]
ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay

Sika ti nangguyod, nangyadayo, insinanak
iti moral ken paglintegan ket ginab-utnak
kadagupan amin a mula iti maysa a lugar
babaen kadagiti nalawa a kalsada a pagnaan

Natikaw ket nagulo dagiti simple a panunot
babaen iti sabalisabali a partes ti dana[m],
ken tiniritirmo ti normal a karirikna
manipud pay idi naipasngay dagiti aldawmo

Ginutigotmo ti sabali tapno irugi ti gubat
ta adda kenka ti kinabaknang ken sapul
ket dagiti annakmo mapapapatayda
gapu iti armas a mangungaw kadakuada

Ipasindayagmo dagiti partuat a teknolohia
a kas man panangay-ayo ken pagragsakam,
idinto nga in-inut a masabidongan ti angin
gapu iti patauden a rugit dagiti faktoria[m]

Takderam ken marknekka iti sitsitik a naragpat
iti bukodmo a pagtaengan ti sarming, 
idinto dagiti tattaom rummuarda nga agmartsa 
ket ungawenda ti biag bayat panagdaliasatda

Ngem diakto la ket makipaset iti intension
a mangaramid iti di naimbag a kananakemmo
kas iti panangulit-ulit ti bukodmo a pagbiddutan:
kitaem- ti nakaparsuaan, nasursuroan.


[Dayta ti kayat a sawen ken kaibatogan
 ti biag- ti mangibinglay ken mangted;
 sangalen babaen kadagita imam kasta met 
 a buyogan ti nasayaat a panagpampanunot]