Kalapati iti Alulod

[Nabulod laeng ti ladawan a naaramat]

No italmegko ti imak iti barukongko,
ti barukongmo ti maiggamak-

Ita, karamutam ti ulok.

No dadduma, ipaaprosmo kaniak
dagiti kamelom nga ammom
a paggaayatko nga iggaman.

Sika, kas maysa a mangidaulo,
ipannak iti sango dagiti tropam.
Mabasaak iti tubbog nga aggapu
dita bibigmo no agdekket ti singsing
sakbay a maimula kaniak ti bilegmo.

Ket no dadduma, iputipotmo kaniak
ti tali sanak igalut iti seradora ti ridaw.

Alaem ti dara ket agaramidka iti kapsit.
Alaem ti kapsit ket agpartuatka iti ayup.
Aramatem ti ayup tapno agdur-as ti sirib
ket agtalinaed ti biag a mangitunda
iti ad-adu pay a biag ken panagbiag.

Nainayad panangbugtakmo kaniak
nga umadayo kas iti tokar ti fluta
no ti kalapati nga adda iti alulod.

Iti isu met laeng a tokar,
inawagannak nga agsubli.

Induronnak iti ruar tapno sangnguek
ti panagbaniaga; kalpasanna,
inyangklanak nga awan tagtagari.

Maysaak ita a danum. Maysaak a siit
a mangsippaw iti pagan-anay ti sabali.

Ngem awan aniamanna kaniak
dagiti agkakadaeg a mabuya!
Ti la kaligumak ket ti kaaddam.

Awan ti rumbeng a pamatian malaksid
no panawan ti nakaikumitan wenno
awan pammatik iti bagik; kas ita,
sisasangoak iti maysa a dayag.

Nakitak ti kutsiliom ket nauram
ti kalasagko. Nagtayabak nga aramat
ti payak dagiti anghel. Ngem gapu ta
ta addaak ditoy ita, kasapulak kad' pay ti payak?

Aldaw ken rabii a sinaluadak dayta a perlas
ti kararuak. Ket gapu ti pigsa ti dalluyon
iti baybay, napukawko no sino ti kukuak.


KALAPATI ITI ALULOD
Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com