Kas Man Awan Aniaman ni Patay [Ken ni Emeterio]

[Emeterio Tungpalan Rumbaoa: Pebrero 14, 1910- Pebrero 26, 1996]

Kas man awan aniaman ni patay.
Awan pannakaibilangna.

Napanka laeng naginana
iti bangir a kuarto.
Wen, kas man awan napasamak.

Awan nagbaliwan ti amin,
nagtalinaed nga isu la nga isu.
Siak ti siak, ken sika ti sika
ket ti duog a biag a nagbinnuliganta
saan pulos a nagaraw wenno napabaro.
No ania man ti adda kadata idi,
nagtalinaed iti pundasionna.

Awagannak kadagiti daan
ken sirok ti latok a nagan.
Kasaritanak iti alisto a wagas
a masansan nga aramidem.
Awan duma wenno diperensia ti tono
ti bosesmo ken dimo met inkawes
iti rupam ti kinaserioso wenno kinaleddaang.

Agkatawaka kas iti dati
no agdanggayta nga agkatawa idi.
No maminsan, agbulbulitor wenno agang-angawka.
Ngem amin dagitoy, isuda ti ragsak kadata.
Agay-ayam, umisem,
pampanunotennak ken ikararagannak-

Dimo pinalugodan a mamulitan
ti sangkaamaan a naganmo nga inaywanam.
Binay-am a nagsao nga uray awan
esfuerso wenno gannuat, nga uray
awan kadaytoy ti aniniwan ti al-alia.

Kayatna ketdi nga ipasimudaag nga amin
a banag ket naibaga, naiparikna
ken naipaawat kas inyebkas ti biag.
Nga inton kaano man, isu pay la ti kasisigud
nga addaan iti amin a kalidad
ken ti kinaagnanayon a di pannakarakrak.

Daytoy kadi nga ipupusay ket karakteristiko
ti situasion a mabalin nga awan aksidente?

Apay a daytoy ti pakaburiboran ti panunotko,
gapu kadi ta saan nga isut' nakaiturongan ti imatangko?
Ngem agur-urayak kenka, iti maysa nga interludio,
ti maibaet a pabuya- manipud iti asideg a lugar,
wenno iti lugar nga asidegka laeng kaniak.

Amin nasayaat, naimbag.
Awan ti masaktan; awan ti mapukaw.
Maysa laeng a nasayud a pitik ti panawen
ket amin agsublinto kas iti dati, no kasanonto
nga agkatawa iti baet ti panaginnadayo
no agkikitatayto manen!

KAS MAN AWAN ANIAMAN NI PATAY
[Ken ni Emeterio Pebrero 14, 1910- Pebrero 26, 1996]
Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com]