Monica

Adda iliw ti palayupoy ti angin
A makidanggay iti naumbi a samiweng
A mamagsala kadagiti sabong ti orkidia.
Wen, Ayatko, dinto aglibak ti panawen
Dagiti nayuged a pakasaritaan addaka a kansion
Ti pusok kadagiti baro nga agsapa a taluntonek
Dagiti allon ti Lahaina Beach a mangsabuag
Iti barukongko ket mayarkos naganmo a kas ulep
Makitak ti apagbingi nga isemmo kadagiti parparmatak
Ket lumtuaw ladawam iti agpakadan a malem.
Wen, dinto malibak a kakibkibinko latta 
Dagiti arapaap ken balligik iti maputar
A daniw ti biag iti kaunggan a kalikagummo
Ta amin dagitoy isagutko kenka a ray-aw ti kararuak.
Ngarud bay-am a subliak imbatik a kaipapanak
Asakek pay maminsan nawatiwat a danak
Tapno aglunit ti sugat a ginubuay nagbiddutak.



Monica
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
Bannawag, Hunio 27, 2005
Aweng: Antolohia Dagiti Napili a Daniw ken Sarita
           Dagiti Mannurat iti Bacarra, p123