Sika Lang

Sika lang
ti pinilik
kadagupan ti amin
a napaadda iti lubong

Ipalubosmo kadi 
a bay-annak lattan
nga agmaymaysa
ken di agragsak? 

Daytoy pusok
isut' pluma
a pinetpetan
dagiti ramaymo

Adda kenka
ti desision
a mangsurat
ti ragsak ken leddaangko

Makitak laeng
dagiti banag a kayatmo
nga iparipirip ken ipalnaad,
ken agbiag a kas ibagam

Adda maris
ti amin
a mariknak
a tarigagayam nga ipinta

Manipud rugi
agingga
iti pagnguddoanna,
awan sabali no di sika

Ta no dika
makita
agballaak, mapukaw
ti namnamak

Ngem no addakat'
sibay
mabirokak manen
ti pammatik

Diak kalikaguman
ti nalablabes 
nga addan kaniak, no 
di ket ti ipaaymo a ragsak

Dimo sapulen
dagiti nakalemmeng
a bulsito, impakitak idin
no ania ti adda kaniak;
ta amin dagitoy naggapu kenka--


Pangngaasim,
aramidem
ti masakbayak
a nasaysayaat ngem ti naglabas.




SIKA LANG
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com