Sagumbida [Ti Daniw]

[Nabulod ti ladawan a naaramat]

i]
Minalem a paspasungadenka
Adda segga ken iliw a marikna
Diak maibturan no dika makita
Ar-arapaapek 'ta nalibnos a rupa


ii]
No dadduma diakon maiturturog
Pus-ongko kasla agbubussog
Ania ket ngaminen a naglapana
Pammagim a nagtapis iti tualia


iii]
Iti naminsan panagdigosmo
Ulesmo pay pinagdalingdingmo
Immuliak narukbos a kayo
Makitak lang mangarkakarinyo


koro i]
Iti sagumbida anian pannakapnekko
No ibukbukmot' danum manipud tabo
Umingar lapayagko a makakita
Dayta managbabain a hardin ni Eba

koro ii]
Iti sagumbida anian pannakapnekko
Pakabuklam pugsatennat' angesko
Sallukobannat' riknak agsuko ni Adan
Aw-awisennak nga umayko gammatan


iv]
Ama aya diak maikunail saka
Iti sagumbida no malukaisan tualia
Ama aya diak pay makuti abaga
Lasbangmo nangbalud dagitoy mata


koro iii]
Iti sagumbida anian pannakapnekko
No ibukbukmot' danum manipud tabo
Sallukobannat' riknak agsuko ni Adan
Aw-awisennak nga umayko gammatan


v]
Matiambaak ngata kunak nakemko
Saniata a nangkayaw daytoy puso
Iti sagumbida kayatko bukkaan tualia
Tapno matagikuak nasadiwa nga Eba




Main-inaw a Kanta: SAGUMBIDA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
copyright.o4.2o13