[Nabulod ti ladawan a naaramat] |
"Panagimula iti bukel, adal.
Panagani, adda nasursuro.
Panawen ti lam-ek, rag-o!"
Iduron karitela ti biag
agarado iti rabaw
ti tulang dagiti natay,
pamatian a di mabirokan
dana a surotan
mangiturong kenka
iti palasio ti kinasirib.
Nabaknang sagrapen
tao a managparbeng,
ngem nalaad iti mata
ti mabaketan nga arugen
ti inkapasidad-
ti tao nga agtarigagay
ken nangatot' arapaapna
iti maysa a banag ngem
dina met aramiden,
sakit isaknap kaputotanna.
Kas ti alingta a maguddua
iti kinelleng, pakawanenna
ti arado a makadalapus kenkuana
ngem kaayatannat' mayagos
ti danum agturong iti karayan.
Kunada, makita a saan
ti maag ti agpada
a kayo idinto a diretso
a makita ti nasikap a tao.
Ti tao nga awan rangrang
iti rupana, saan pulos agbalin
a bituen; ngem adda ayat
iti eternidad babaen
iti panangpataud ti tiempo
nga aganus ken agsakripisio,
ket ti alimbubuyog a naregget
nga agsapul ti diro
awan panawenna iti ladingit.
Rukoden relo ti oras dagiti laglag,
nakiting ken akikid ti panunotna;
ngem iti kinasirib, awan relo
a makarukod kenkuana.
Amin a masagrap a taraon
awan mausar a tabukol wenno
palab-og a pangpuros
ken pannakalutoda; maidasar ketdi
amin a bilang, dagsen ken rukod
no aniaman ti maimula ken maapit;
Awan met tumatayab
nga aglayag ti nangato
iti bukodna a payyak--
kasapulanna ti angin
a mangingato kenkuana,
ket ti bangkay
saan nga agibales iti masakit.
No ipilit ti maag ti kinamauyongna,
ti ammona nasikap; ngem abbonganna laeng
ti kinaawan prinsipio a pakaibabainan
ti bukodna a dayaw...
TI KUNADA
Rudy Ram. rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o8.2o11
No comments:
Post a Comment