ITA A PASKUA, IBURAY TI AYAT NGA AGAUN ITI PUSO

 

ITI Filipinas, nangruna iti ili ken probinsia a dimmakkelak, marikna ti espritu ti Paskua iti nasapa a bulan ti Setiembre. No matappoganen ti umuna nga aldaw ti Setiembre, maipatayab metten kadagiti radio stations ti umuna nga ayug Pamaskua. No saan, mai-display dagiti Christmas decorations kadagiti department stores ken uray pay iti pagtaengan.

Kasta met a pagproblemaan dagiti dadduma no sadino ti pangalaanda ti nayon nga igatangda iti regalo a para kadagiti annak, appoko, kabagian, gagayyem ken am-ammo. Wenno para ti taraon a maidasar iti lamisaan a pagsasangnguan iti bisperas ti Paskua.

Nagasat dagiti dadduma ta adda dita ti 13th month pay nga awatenda manipud iti pagtrabahuan a nayon ti gastosenda.

Iti sabali a bangir, irugi met dagiti ubbing ti mapan agpaskua wenno ag-carolling tapno makaur-or ti kuarta a nayon a gastosenda iti Paskua. No panunoten ti kaadu ti grupo dagitoy nga ubbing a bumalay-balay nga agpaskua iti rinabii manipud ti bulan ti Setiembre agingga iti Disiembre. Dagiti dadduma, yalud-odda pay ti mapan agpaskua agingga iti Enero iti sumaruno a tawen.

Mamatika? Wen, pudno. Daytoy a tiempo ti panangipaay iti ayat ken ragsak kadagiti ubbing tapno maitag-ay ti espiritu ti Paskua nupay ti kinapudnona, adda met dagiti dadduma nga ubbing a palabsenda lattan ti Paskua iti rason nga awan ti mabalbalinan ti pamilia.

Iti daytoy a panawen, matipontipon dagiti pampamilia, kabagian, gagayyem ken am-ammo. Dagiti miembro ti pamilia nga adda iti ballasiw taaw, ikagumaananda ti agawid tapno laeng makapaglalanglang ken agdedenna iti ipatpateg a pamilia. Naragsak ti tiempo ti Paskua, napno iti ramrambak.

Kadagiti punsionan wenno pagdadayaan, adda dita dagiti nasanger a mainum, adda pasala ken agkanta babaen ti karaoke/videoke[s]-- dagitoy ti masansan nga aktibidad a maaramid. Kalpasanna, mayawat ti regalo. Saan met a maliklikan ta no dadduma, adda latta met dagiti saan a makatengngel ti panaginum ket mabartekda. Ngem paset daytoy ti ragragsak.

Iti kalsada, adda dita dagiti agtutubo ken ubbing nga agpalpalibbaang wenno agpaputok iti rebentador, kanyon bambo, kuwitis, loses ken no ania pay ditan a mabalin nga aramaten a mangparagsak ken mangpadaeg ti Paskua. Kaugalianen dayta kadagiti Pinoy. Para kadatayo, kasta ti pudno nga anag ti Paskua a mangpasangbay iti pannakayanak ti Manubbot.

Awan ngatan sabali a gagem dagiti tattao no di agragsak ken mangparagsak dagiti dadduma. Ket agtultuloy dayta a ragragsak aginga iti umuna a lawas ti Enero a panangibaba kadagiti Christmas decorations.

Para kaniak, mamatika man iti Christmas wenno saan ken no tiempo ti Paskua wenno saan-- ti mangiburay wenno mangisagut ti aniaman nga adda kenka ti kangrunaan ken kapintasan a maaramidmo iti daytoy a tiempo. Saan nga importante ti pirak wenno aniaman nga adda, ngem ti ayat, ti pategmo para kadagiti agkasapulan ti tulongmo. Ti nasken, marikna ti sabali nga uray awananda, adda pay la anag ken pasetda met iti Paskua.

Dayta ti pudno a kabagasan ti Paskua. Ti ayat nga agaun iti puso.*

.

.

.

.

.

ITA A PASKUA, IBURAY TI AYAT NGA AGAUN ITI PUSO Rudy Ram. Rumbaoa

samiwengkenayatnirudy.blogspot.com

[nabulod ti ladawan a nausar]