Simmiripen kaippasngay nga init.
Immuliak iti narasi a korona
ti kayo ti aruo. Mabalin a kunam
a padasek a gaw-aten ti langit,
panawen ti naited a gasatko
ta mabulsekak iti amin a lawag
a makitak ket mariknak ti ritmiko
ti panaggitebgiteb ti amin a nabiag
nga aggun-gunay kaniak: dinawatko ti kaasi
Nakikallaysaka kaniak iti bulan
ti Hulio ngem aruat pay laeng ti amin
a nakitabuno iti padaya dagiti pagan-anayda
ti kalgaw-- ti manggas ti langit
Narangrang iti aglawlaw idi
a kas kapudaw ti nayaplag nga ulep
iti tangatang, kurbada ti pagnaan
iti kalsada dagiti umatiwerret
ken napardas a luglugan. Naragsak daydi
nga oras, ngem nagsangitak a maited ti kaasi
Idi agpigsupigsol ti pannagnam,
"ipaiddam iti datar," kunak iti inak.
Naikapet kenka ti maskara ti oksiheno
tapno adda angin nga angsem-- nga uray
apagdarikmat, malang-ab ti artipisial nga angin
Nagkaribuso ti ospital, rummuar-sumrek
dagiti annak. Natangken ti regreg
dagiti niebe nga agdisso iti daga.
Nakagin-awa kadi ti langit?
Magustoam ti maris a nangalikubkob
ti lubong. Naibaga ti kinaawan-anag
a panagbiagmo: ngem kenka
magustoam latta nga allilawen ti pudno
Diak ammo no asino ti naitanem
iti babaen ti daga a nagtakderan
dagiti sakak, ngem makitak ti puersado
nga iseserrek ken panagtakaw bayat
a pinanawak ti gloria dagiti tao
Diak ammo no kaano nga isardengkot'
panamatik iti langit, wenno aramidek
ngata? Nalabit, nasaysayaat laengen
a maisardeng ti panangammok--
ti kaipapananna.
Kasano ngarud a sangitam ti maymaysa
a reliko, Juan, idinto
ti langit koma ti pagleddaangam?
.
.
.
.
.
LANGIT
Rudy Ram. Rumbaoa
Mier. o1 Ene. 2o25
Wai, Maui
samiwengkenayatnirudy.blogspot.com
No comments:
Post a Comment