Agyamanak, Ama

Nabukkaan ti bara
kas ti gumilgil-ayab nga apuy
ti kinupkupikopanyo a rikna
tapno madanuman ti natikagan
a bukel ni karayo,
inimasyo ken ni Ina
ti naglangoy ken nangnanam
ti naruk-atan a diro ni ayat
iti kinaulimek ti rabii.

Para kadakayo a dua
a naglemmes ti ragsak,
naysa daytoy a gameng
a rumbeng a saluadan...

Adtoyak ita:
ti bunga
ti nairut nga arakup
ken areng-eng
a samiweng ti nagpatnag
a nakasukogak.

A, Sikat' arkitekto
a nangdisenio kaniak
tapno agbalinak a parupam-
ti kinaasinom
ti kinataom...

Kitaem,
Siak ita ti Siak
ta no saan a Sika
awanak ita.

Agyamanak, Ama,
ta babaen iti panagkallaysa
ti itlog ken semilia
ti napudno nga ayat,
Siak daytoy ita!


AGYAMANAK, AMA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
**Naipablaak iti June Issue ti Fil-Am Observer Newespaper ti Maui-
[www.samiwengkenayatnirudy.blogspot.com]
[CR.2008.by.rudyram.rumbaoa]
______________________________________