Arte ti Pananggargari

[Nabulod laeng ti ladawan a naaramat]

Nagsao ken winaywayanna
  ti bukodna a bagi iti nagduduma
  a maris ken burda maralastiko
  a pagan-anay manipud siket
  agingga iti luppo a sadiay adda
  aminen kenkuana a pang-engganio
  ti panagaruat: timmammidaw
  ti kinabaknang nga ik-ikutan
  barukong; simmirip, nagadiwarat'
  banglo naabbongan a pingping ni Eba.

Iti nakemna nakaruk-as nalaus
  panagayat ti lasag, gumil-ayab
  bara ti bagi a napno iti rugso;
  ngem awan magutigotna
  uray maysa a narukop a walang
  nga Adan tapno matnag iti palab-ogna
  gapu't kaawan raman ken tamnay
  ti duog nga arte ti pananggargari...

ARTE TI PANANGGARGARI
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com