Erogonos

[Nabulod laeng ti ladawan a naaramat]



Abbongannak iti nabara
a sang-aw panagangesmo,
pakintayegem, patigergerem

dagiti lasagko ti kasta unay
a pannakapnek; kalpasanna paguyasem 
a kasla uleg nga ibaba ti dila,

ket ti di maawatan nga iparnuay
a panagdalagudog ti barukong
gaput' nalailo nga areng-eng,

dagiti bassit-usit a lamma
ti kuddot, karais ti kuko
ken kagat a marka ti ragsak--

agkokorusda ken makusokusso
ti buok, agringgor ti di maibagay
a garaw dagiti lalaem iti uneg

ti agpigpigerger a boksit.
Ket no adda pay mabati 
a simbeng panunotko, mapasamak

ti rumbeng a maaramid; 
no mapukaw puotko gaput' paksuy
iti panangyaradum bibigmo

ditoy luppok, ti bisked
ti bagim a nakatuon kaniak
ti mangalay-ay amak ken buteng

a nangbalkot riknak, gapu ti dayta,
sapsapulek ti di maipadtoan 
a panagimas ken pannakapnek ti ganas--

dinak pengdan, dawatek
nga ulit-ulitem nga aramiden daytoy...



EROGONOS
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o8.o5.2o15