Ibagam Man No Addaak Kenka?

[Nabulod laeng ti ladawan a naaramat]

Bassitak a paset ti tapok 
a naiwaras iti lubong.

Gapu ta bassitak a banag 
kunak, agtalinaedka.
Kenka init, rayrayem lawagmo.

Ibagam no maysaak nga angep 
ti bigat, wenno agang-anges iti rabii.
Ibagam no siak ti pul-oy

iti rabaw ken rankis ti bantay,
wenno albor, timon, agtarawidwid 
ken biga, kasta met nga ibagam

no siak ti raw-ang ti koral.
Ibagam no siak met laeng 
ti pagbatayan a kayo dagiti tumatayab--

mainanaanda kadi nga agbatay iti sangak?
Ibagam no adda kinaulimek, adda kadi
panunot ken boses ti musika manipud

iti fluta nga iyaplaw ti angin a mangapros
ti alipaga ti bato-- ti nagkudrep a metal?
Agbagtit ti gamugamo a manglikawlikaw

ti nasindian a kandela ket umatibuor
ti angot ti kesset no masagid 
ti payakna ti apuy, agpukaw banglo

ti rosas uray pay ti ruisenyor.
Ibagam no maysaak nga urnos
wenno talinaay ti amin a nakaparsuaan,

ti sirkulo ti riniwriwriw a bilang
dagiti bituen iti tangatang, 
ti ebolusion, ti sirib, ti mangibayog,

wenno kas ti maregreg a bulong
a maipalais a mayadayo kenka.
Sika ti makaammo ti amin

ta sika ti ay-ayatek, ti makarikna,
ti makakita no ania ti, ken ania ti saan.

Sika ti kakaisuna a pateg kadagupan
ti amin a mangirakurak no asinoak--

Ibagam man no addaak Kenka?



IBAGAM MAN NO ADDAAK KENKA?
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com