KInaadda Ditoy Lubong

[Nabulod laeng ti ladawan a naaramat]

Kinaadda Ditoy Lubong
Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay


Innala ti ayat ti gagangay
nga aramidko ken pinunnonak iti daniw.

Pinadasko ti mangulit-ulit
ngem nagtalinaed a siuulimek,
awan pigsak no laeng sika; ta sika
latta ti mangtengngel amin a garaw,
panunot ken panagsaok.

No maminsan agpalakpak ken agkantaak.
Masansan a maraemak, nasudi ken napamaysa,
ngem sino ti makaibtur ti pigsa ti angin
ken makalagip dagiti banag a naglabas?

Linuktan ni ayat ti barukongko,
ket nagsubli ti panunotko, ngem
ti pakaigapuan ti panaganus
ti pimmanaw. Ti la kaasi ti nagbati,
ngem di nangted ti dir-i no di ket anil-il
ken di normal a temperatura ti bagi.

Nakitak ken in-inut a nagbalinka
a kawaw. Daytoy a kinaawan-anag,
napimpintas nga amang ti kinaaddana,
rebbaenna ti pannakaadda; nupay kasta
no umay, dumakkel ken sumayaat ti kaadda
ken mangpartuat iti ad-adu pay
a kinaadda ditoy lubong.

Pagtalinaeden ti bantay ti aweng iti unegna,
kasta ti panangtengelko ti bosesmo.

Asul ti tangatang. Bulsek ti lubong a kas iti tao
a nagsammaked a nagtugaw iti kalsada,

ngem asino man a makakita iti kinakawawmo
makitana iti nalablabes ti asul ken iti labes
ti bulsek a tao.