Nakana a Panaginana

Mayarig a padaya ti kasar
ti ipapatay- panaglalanglang.
Ti Dios a nasirib, ti akin-nakem,
ti akin-sikreto, ti misterio.

Maymaysa ti Dios.

Salputen ti lawag ti init
ti tawa ket gapu iti dayta,
anninaganna ti sibubukel
a kuarto;

No marepkan ti tawa,
nasipnget ti aglawlaw
ket ti ubas nga imet
ti tunggal maysa
agbalin a nalidem nga arak.

Ti siasino man nga agbiag
iti sidong ti lawag ti Dios,
mataraken ti ipupusay.

Saan nga ukomen
dagiti adda iti nalablabes
ngem ti panangukom.
Dika met agsao iti ania man
a banag a dimo pay napadasan.

Adda sabali a lawag
ket babaen iti dayta,
padasen a siripen.

Adda mata a mangkitkita kenka
a dimo ammo ti 'yanna, palubosam
a buyaennaka.

Bay-an a mapno ti mata
iti lua, ket palubosam
a maturog bayat a siriringka-
ta no saan, agsagabaka
iti nakana a panaginana.

Agbalin a nalawag wenno klaro
ken managlaglagip iti pannaturog.
Ipaulog wenno yebkas kas maysa
a sinao ti tagtagainepmo, ket no
saan a naannayas ti panunotmo,
kas ka la agipabpaburek iti danum
wenno aglutluto nga awanan puot
iti sinigang nga ayat a sapsapulen
ti pannakipagmaymaysam
iti intero a panagbiagmo.


Nakana a Panaginana
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com