Panaglantip iti panagrururos
ti pasinunoan, panawen
a makaabbukay ket yanninawna
ti agdama iti panagrusing
ti pudot ken karidad;
bisibisan ti Abril ti tapok ti kalman,
ngem nabara daytoy nga aldaw
kas kadarang ti agmatuon, ditoy-
maukrit ti pusok gaput' nakana
a saem iti pananggulibmot' ayat.
Natipontipon ita ti amin
a gagayyemta tapno masaksian
daytoy matrimonio, ket ti relasion
tunggal maysa kas da la nareppet
a bagi iti pannakikaysam iti agnanayon.
Daytoy panagbalin a maysa
ti dua tapno mawayawayaan
ti kararuam iti apagsayud laeng
a tengngel ti mahika, idawatko
nga iburaymo ida kas ray-aw;
ket sapay ta daytoy nga aldaw
ti panagrambak ket namaris
kas iti bado nga ikawesmo,
agtalinaedto a saan nga agkusnaw...
ITI NAGBAETAN TI KALGAW KEN NABASA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
No comments:
Post a Comment