Asinoak Koma Ngarud Ita?

[Nabulod laeng ti ladawan a naaramat]

Umayka, umasidegka.
Karuprupanak.
Tengngel ti ayatko
ti amin agingga a dinamagmo,
Nasaktanka kadi?

Bayat a mariknak
ti kaaddam kaniak,
inkarigatak a labanan
ti panaglimpatok.

Kunam, Bravo. Dinayaw,
binigbigmo ti nagpaiduma
a laing ken kasanayan.
Tengngel itan ti heneral ti amin.

Idi rabii nagbalin a maysa
a linas ti instrumento
daytoy a bagi-
nagtokar iti samiweng ken ayat.

Daytoy ti klase ti pagkontaran
iti kinaasinok kenka,
no ti siak ti sika
ti sika ti siak
wenno siak para kenka.

Ngem kalikagumak manipud
iti daytoy a panagsinnukat
ti rikna ti mismo a kappia
nga adda kenka.
Kayatkot' agkallautang
iti uneg daytoy a misterio.

Imbagam kaniak, padasem
ti agtalinaed,
sika nga agpigsopigsol a gayyemko.

Ket ti agbibitin a kayo
ti ubas ditoy, mabalin kadi nga uliek?

Ngem no kunam nga umadayoak,
agbalinak a nakakaasi, miserable.
Aniat' aramidek tapno kayatmo
ti agtalinaed kaniak iti amin a tiempo?

Leddaang ken di mapakadaan
a rag-o ti agtaeng iti ridaw
ti puso no sadino nga awan
ti oras ken distansia a makuenta...

Mamatiak, baliwan ti kinaubing
a rikna ti mataengan.
Mapabaro manen ti rupak.

Ngem kunam, matikawkan sa
sika naulimek a gayyemko.


Asinoak Koma Ngarud Ita?
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com