Masansan a Diak Agsurat Kadagiti Napintas a Banag

Masansan a diak
agsurat maipanggep
kadagiti napintas a banag-

Nalabit, gapu ngata
a maysa laeng a mata
ti makakita iti nakusnaw
a pungan ken ti maysa
a suli ti bibigmo
ket ti nakawakray
a buokmo, nagsadag
iti bangir a paset ti rupam
ken nakakidem ti akinkannigid
a matam-
nargaay iti turog.

Masansan a diak
agsurat maipanggep
kadagiti napintas a banag-

Nalabit, gapu ngata
a maysa laeng nga ima
ti makagaw-at iti babaen
ti ules ken makaapros
ti nalamuyot a kudilmo
a mamagbiag ti riknak
no addaak dita sibaymo;
agkarayam ti bara
manipud kenka a dumalan
iti takiagko agingga
a dumanon iti rupak.

Masansan a diak
agsurat maipanggep
kadagiti napintas a banag-

Nalabit, gapu ngata
ti balikas a mabalin
a pangawagko kenka
ket mariingka iti nairut
a pannaturogmo
ti pannakangegmo ti nasudi
a kablaaw nga ipagarupmo
nga isut' panagpakadak
sakbay iti idadateng
ti sabali nga aldaw.

Ket wen, masansan a diak
agsurat maipanggep
kadagiti napintas a banag-

Nalabit, gapu ngata
nga agbalin a pamiliar
ket saanmo kayat
ti pannakayasideg
ti riknak kenka iti inaldaw
a panagdenna, panagkuyogta
wenno ti pannakipagnaedko
dita pusom a kas taengko
ket dimo ipalubos nga agbunga
ti mabalin nga ekspektarem
a panagsampaga ti ayat
nga agresulta ti saan a gagangay
a panangtratom kaniak
tapno masursurom
nga aprisiaren dagiti aramidko;

Ala wen, ikarik a diakton
agsurat kadagiti napintas a banag.

Masansan a Diak Agsurat Kadagiti Napintas a Banag
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com