Sika

Impalais ti angin
Ti isemmo kaniak.

Nariknak ti dingpilna
Sinarotna ti bagik
Kinuldingna ti pusok;

Nagtapaw ti riknak
Ipagarupko no agar-arapaapak
Ipagarupko no addaak laeng
Iti nalikudak a kalman,

Ngem naglanga
A kristal ti tema
Ti nasapa
A bigat.

Kaduam ti angin
Kaduam ti init
Kaduam ti bulan
Maysaka a datdatlag
Kadagiti matak.

Inton rabii agtugawka
Iti nalinak a danum
Ti refleksionko.

Inton rabii ayatenka.

Inton rabii denggen
Ken bilangem ti ritmo
Tunggal pitik
Ti pusok.

Mayarigka a kas
Maysa a mannanakaw
Nga agsamsam
Ti kinabaknang
Iti tunggal anges
Ti bagi ken kararuak...

Nupay kasta-
Addaka latta
Kadagiti palayupoy
Ti angin ti rabii,
Kenka ti kinatalinaay
Nga uni;
Maysa a perfekto
Nabileg iturayanna
Ti garawko.

Sika ti baybay
Kenka, aglangoyak
A sitatalek.

Tengngelmo dagiti allon,
Dinakto baybay-an
A malmes
Agingga a madanonkot'
Takdang.

Aywanamto, dimo
Ipalubos a masugatak
Iti aniaman a pakadangrak
Ket yadayonak
Manipud iti nakana
A leddaang.

Ket ti apges a mariknak
No masugatak,
Umay agpaeng dita pusom.

Isut' gapuna-
Maysaka a linglingay
Sika ti isem
Sika ti apuy
Sika ti amin
Nga adda a makita
Ti matak.

Sikat' pakabuklan
Ti kinapintas.

Darepdep
Dagiti amin a darepdep
Mabalin a Sika
Ket Siak!
Mabalin a Sika
Ti Siak!-
"Agingga a dumteng
Ti patay kadata..."


Sika
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com