Panaganges ti Maysa a Mistiko

[Nabulod laeng ti ladawan a naaramat]

No mairikep ti ngiwatko,
agsardeng panagdaniwko.
Ngem ti tukak nga adda
iti asideg ken adayo, saan.
Ngakngak a ngakngak
uray matudoan saan 
a makutoran. No aganges 
sumngaw ti uni di aglabes.

Iti kasta, kapadana ti wagas
ti saan a mailemmeng a kalag-an
a panagpettak ti panaganges
ti maysa a mistiko-

Nagtengko daytoy nga alimpatok,
natukkol ti pluma nga iggemko, 
nagmansa ti nangisit a tinta
iti datar iti pannakaregreg
ti palda manipud bagi ti imnas
nga inikkak biag a sursuratek
ket in-inut a nagungap ti luppo
tapno sumrek ti parabur kenkuana...


Panaganges ti Maysa a Mistiko
Rudy Ram. Rumbaoa
Dagiti Koleksion a Daniw, Sarita ken Dadduma Pay
www.samiwengkenayatnirudy.blogspot.com