Panagtalek

[Nabulod laeng ti ladawan a naaramat]


Pasantakem ti arapaap
a pagarupem a dimo naragpat,
ita nga aldaw kadagiti amin nga aldaw
ruk-atam liday ket sarabuem ti ray-aw

Malagipka, kaano laeng daydi
Dayag nga impangrunak, mangnibinibi;
kunam a nasapulamon agikut iti pusom
saanka nga agang-angaw uray agdanapeg ti barukong?

Pudno a tinagibim pannakigasanggasat
daydi danapeg a naparnuay inka nalasat,
nagballigika tunggal aldaw a naglabas
nagtalekka a sikakaradkad iti pannubok ti biag

Ita, no mano nga aldaw kalpasanna
daydi naudi a pannakibalubal magun-od gungguna,
pudno nga inlagam iti panunot ken kararuam
panagtalek iti bagim; addan nagrang-ayam

Agsubliak ta pagarupek naragpatmot' arapaap
dimo inkankano dagiti balikas a pangublag,
ngem binay-am ketdi a matun-oyam
tapno magun-od napintas a panungpalam

Wen, awitko ita ti sabong a sagut kenka-
ti maminribu a kaipapanam
iti panagsabat manen ti dalanta
tapno agsampaga ti masakbayan.


PANAGTALEK
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com