Napukaw ti Panunot [Ken Kinasiribda]

[Nabulod ti ladawan a naaramat]

dika agladingit, filipinas,
iti lubong a nautoyan ti bannog,
adda kenkat' tartarigagayam
dika palugodan bagi a marnek
iti awanan-panggep a leddaang.

gapu ta saan a nalawag
no ania ti adda ken awan,
agragsakka, dika malday
ti nalpasen ken di pay narugian.

petpetan dakulapmo, filipinas,
ti amin a palab-og nga iggem
ti lubong, nagrutingen kinaberde
ket masay-op banglo ti hardinmo;

iti maysa a rabii agtugawka
a kas linnaaw kadagiti minuyongan
agingga a purosem isisingising
ti baro a panagbannawag.

mamaliw dagiti pumusay
agbalinda a dapo ken tapok, 

maisina ti maysa iti sabali a kas 

ti balikas nga awan kaibatoganna;

'nia aya ti arak a nainum
ken nakabartekanda ta agingga
ti aldaw a pannakaukom napukaw
ti panunot ken kinasiribda?

NAGPUKAW TI PANUNOT [KEN KINASIRIBDA]/Lost Consciousness [And Knowledge]
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com