Kas Yebkas ti Biag [Ken ni Emeterio]

Emeterio T. Rumbaoa

Kas man awan aniaman ni patay,
awan pannakaibilangna; napanka 
naginana iti bangir a kuarto

wen, kas man awan napasamak.

Awan nagbaliwan ti amin,
nagtalinaed nga isu la nga isu.
Siak ti siak, sika ti sika ket ti duog
a biag a nagbinnuligan saan pulos
nagaraw ken napabaro. No aniat'
adda idi, nagtalinaed iti pondasionna.

Awagannak kadagiti daan ken sirok
ti latok a nagan, kasaritanak 
iti alisto a wagas kas aramidem.
Awan duma ken diperensia tono
ti bosesmo, dimo met inkawes
iti rupam ti serioso ken leddaang;

umisem-agkatawaka kas iti dati.
No maminsan, agbulbulitor
ken agang-angawka; ngem dagitoy
isuda ti ragsak kadata, ti pamilia.

Dimo pinalugodan a mamulitan
sangkaamaan a nagan nga aywanmo.
Binay-am ida a nagsao uray awan 
esfuerso wenno gannuatda-- nga uray 
awan kadagitoy ti aniniwan ti al-alia;

kayatna nga ipasimudaag nga amin
a banag ket naibaga, naiparikna
naipaawat kas iyebkas ti biag nga
inton kaano man, isu ti sigud a kalidad
ti agnanayon a di pannakarakrak.

daytoy kadi nga ipupusay karakteristiko
ti situasion a mabalin nga awan aksidente?

Apay daytoy pakaburiboran ti panunotko,
gapu kadi ta saan nga isut' turong imatangko?
Agur-urayak kenka, iti maysa nga interludio,
ti maibaet a pabuya-- manipud iti asideg a lugar,
wenno ti lugar nga asidegka laeng kaniak

ket amin-amin nasayaat, naimbag.
Awan masaktan; awan mapukaw.
Maysa a nasayud a pitik ti panawen
ti panaguray, agsublinto kas iti dati, 
no kasanonto ti agkatawa iti baet
ti panaginnadayo-- no agkitatanto manen!


Naragsak a Pananglagip ti Aldaw ti Panagtaom, Ama


KAS IYEBKAS TI BIAG
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com