Asino

[Nabulod ti ladawan a naaramat]



Asino ti mangkanta
Ti kinaagnanayon a kanta
No datayo ket siuulimek
Ken aggemgemgem dagiti ngipen?

Asino ti mangted iti timek
Ken pannakakita ti bulsek 
A lubong no dagiti imak
Ket saannaka pay a masagid?

Sika ti tiempo, dagiti aldawko,
Ken tawen iti saklolo ti agarubos
A darat iti agpitpitik a baso ti pagorasan—

Ladingit ti pakdaar ti sipnget 
Ket yula ti alipugpog 
Ti natayengteng a maris nalabaga
Iti labes dagiti di makita a parsua.

O Ayat, ayat,
Ti maudi a balikas!
Ti panagrasuk ti dara
Ket bumluong ti napigsa a timek—
Sika kadi ti akin-nakem?
-
-
-
-
-
-
ASINO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com