Gapu Ngata Ta Saanak A Nalatak

Nagtawatawak
iti gangannaet,
a lugar, nasabatko
iti dalan nagduduma
a kalsena a puli
ken kultura.
Ket wen, 
maragsakannak
ta saanko 
a maawatan pagsasaoda--

Iti bannogko,
indalupisakko ketdi
ti nagtugaw
iti naraber a karuotan
a naglinong iti sirok
dagiti bulong 
ti narukbos a kayo
ti aruo. Gaput'
paksuy a nagnagna,
insadagkot' bagik
iti nalukmeg a bagi
ti kayo ket binuyak
pangen dagiti kuton
iti yuulida a nagpangato
a bagkat ti taraon
a pagbiagda;
sadiay sangsangkamaysa
a naummongda
tapno saganaan
ti sumangbay a didigra.

Kamaudianna, adda kappia
a mariknak ta didak
kinagat dagiti kuton
gapu ngata ta saanak
a nalatak ken am-ammo
dagiti tao a nasabet
ken kinapulapolko iti dalan...




GAPU NGATA TA SAANAK A NALATAK
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com