Dua a Daniw [Ken ni Emeterio]

i.

Kenka ti aglaplapunosan
nga ayat nupay addakan
iti bukodmo a lubong--awatek,
saankan a makita ken maaprosan.

Ket uray aggunay ti kontinente
a nagtakderak tapno ibualna
dagiti adigi ti lubong a maisina
kaniak; adtoyak, sikakapetak.

Maipalais riknak iti diak masinunuo
a lugar, agparang realidad,
agrehistro dagiti saludsod, ngem 
tumpuar dagiti tubeng a manglukais
ti sungbat ta isuda ti mangitunda
ti pagkapuyan bagi gapu iti amak
ti aniaman nga iparnuay ti wakwak
ti dakes a panangipapan ken lagip--
ngem tengngelmo ti amin
a rekuerdo dagitoy a bahia.

O, Ama, ti nasged a tarigagaymo
kaniak ti kaimbagan a mangitag-ay
ti pusok; ti panangsurot ti desdes
nga imbati dagiti tugotmo a nagnaam
nga uray kalpasan naglabas ti tawen
a dikan makita a sibabagi, maipallayog
kararuak nga agpayakpak a mangasak
iti dalan ti masakbayan gaput'
pannarabaymo ket sikat' pigsak
tapno paksiatek duadua ken panagamak.


ii.

Dimo imbaga ti papanam
dika nagpakada, awankan
idi naammuak nga inasakmo
ti desdes a kaikariam.

Mailiwak met. Kailiwko
ti kaaddam koma. Binirokka
kadagiti naglabas a kalman
ta bareng kunak maitedna
ti sungbat ngem napaayak.
Kayarigak ti nagsapul
ti napukaw a dagum
iti kagaramian iti ayatko
a maaprosan-makitaka;
nakas-ang ti nagtungpalan--
nakana nga ut-ot ti nariknak.

No koma ayat ti makasalbar
idi nagbugsotka, intedko kenka
ti biag. Ti adda kaniak isu
ti tanda ti ayat nga intedmo
met laeng. Iti kasta, saannaka
a kinawit ti kumpay ni patay.
Ngem saan kadi a kastoy
ti rueda ti biag? Adu a rason
ti di mailawlawag iti aglawlaw
gapu ngata ta Isu ti pagayatanna?

Ngem inayatka ti kasta unay
uray nabayagkan a nakainana.
Ayatenka latta. Silalagipak latta.
Isu ti mandar ti panunot.
Isu ti marikna ti pusok,
adda latta lugarmo kenkuana
nga awan asinoman a mabalin
a mangpunno ti pagkurangan
ti nagbaetan no di Sika.

Saanka a pimmanaw a nagmaymaysa.
Ti pasetko, nakipagaliwaksay met kenka
iti aldaw a nakipagtaengka Kenkuana...





DUA A DANIW
[Ken ni Emetrerio]
Rudy Ram. Rumbaoa
Dagiti Koleksion a Daniw, Saritam Kanta ken Dadduma Pay
www.samiwengkenayatnirudy.blogspot.com