Dua a Daniw

1.

Agtutunos pallayog dagiti sabong
ket makasalibukag iti rikna 
ti ipaarikap nalamiis a pul-oy 
idinto a pagsalaen ritmo ti angin
dagiti agdudungsa a bulong-kayo
iti mabungon a rapsodia ti daniw--
Masapul kad' pay imdengak ilalabasna?

Kayarigak ti alimbubuyog
nga agkatangkatang, agbirbirok iti diro
ngem kakaayatak met a buybuyaen
ken kasarsarita dagiti mayepyepyep
a napudaw a rebulto iti parke a saan
nga agsao ken makarikna iti aprosko
gapu ta partuatda laeng
ti nasariwawek a panunot ti tao.

Ngem no biddut panangipagarupmo
ti aramidko, kiddawek kenka 
a malawagan nakusnaw a lagipko 
ta agbibiagak iti panaas nga imbati 
ti di pay naglunit a sugat; no masagid, 
mapespes nakana nga ut-ot.



2.

Denggem pitik nadagsen
a limdo 'toy pusok--
daytoy kadi a pait
ti saem ti iliwko kenka?

Pumusay met ti ragsak
iti naglukongan ti lima,
ket bayat apagdarikmant
a pannakisarang kaniak
ni patay iti patibulo, aniat'
banagen dagiti agrupsa
a kataltalonan a nalikmut
iti sipnget, napegpegges
kadi nga angin ngem 
ti ut-ot a dumanon iti panunot?

Awan pagilasinan tagtagiurayek:
dagiti maidaton a sabong
kadagiti didiosen, ti alingasaw
ti kalgaw, ti galangugong
iti baybay, ti apaggilap 
nga ilalabas ti layap iti tangatang,
wenno masiglot ti lamiis
ti rabii a banag koma
nga ilulutuadmo iti lagipko...




DUA A DANIW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[reb/rep./CR/RRR.Maui]