Sino Ti Mangriing ken Ni Patay Ita?

Sino ti mangriing ken ni patay ita? Ti saan nga agressat
a pannakaibukbok danum-baybay iti labes ti tunggal
nasipnget a suli ti lubong, ti pannakaitagbat ti nasilap
nga espada, ti manglaylayen a mula ken awis kenka
sadiay ti rono dagiti bulong, ti gumilgil-ayab nga apuy
ken isu amin a langa ti kinadakes? Ti garangugong
ti angin, makatikaw panagtaul ti aso iti sanguanan 
ket mapagbiddutan nga anghel a magmagna iti kalsada.

Nasarakak daytoy sabong ti rosas iti dalan ket kunak:
"Iti uneg ti sirkulo ti lawag a pagorasan ti siitan a Dios,
itedko kenka, ilatagkot' bagik iti naraber a karuotan--
agdeppaak, agal-alak a mabuteng, napaspas panagbitek 
ti pusok ngem agparintumengak iti sakaanam 
tapno dawatek a bay-annak nga agmaymaysa; diak kayat
a masingaka iti kasta unay gaput' pannakaparigatko".

Ngem sino ti mangriing ken ni patay ita? Ininumko
ti nangisit a dara iti kopa, nakitak a nagraniag ti bulan
nga awan nakadlaw; nalabit, saanak a pimmusay 
ngem nagtubo ti nakaberberde a mula ti bain-bain
iti aglawlaw, nakitak dagiti siitan a kayo ken itutupuar 
ti agsilud nga insekto a nagrugian ti maysa nga abut 
nga awan pakausaranna, rimmubrob ti apuy iti naspak 
a kayo ket madarang ti kasta unay dagiti magna 
iti dayta a dalan; agikkis ken agsangitda iti napalalo,
nagpusaksak ti rupa ti maay-ayatan a demonio--
naggudua ti nakuridemdem a lawag ti init.






SINO TI MANGRIING KEN NI PATAY ITA?
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
*immuna a naiposte iti wwwtaraontibiag.blogspot.com
www.samiwengkenayatnirudy.blogspot.com
[CR/RRR.o7.2o12.Maui]