Mangbirokak Kadi Iti Sabali?

O kararuak, napunnoanka kadin kaniak?
 Saan, saan, saan.

Iti naminsan a naguldagak, kunak no
Nalamiisakon a bangkay ta diak maikunail
Ti bagik, kasarsaritaka ti kunak ngem
Diak mayesngaw ti bosesko. Mangngegko
Ti aglawlaw, ngem awan makangngeg iti timekko.
Awan makipagrikna ti ararawko--

Mariribukanak ta ipagarupkon no addaakon
Iti tanemko. Mariribukanak no addaak
Met la kenka, wenno sika adda met la kaniak.

Naglamiis ti mariknak, ti aglawlawko...

'Yarigko payen ti bagik a kas maysa
Nga angin ket sika ti bulong. 
Ta no dika magunggon, ania ti aramidem?

Nupay kasta, Siak ti siak, wenno Sika ti sika,
Wenno Sika para kaniak. Kasta met a Siak
Ti siak, sika ket Sika ken sika para kaniak.

Ngem kunam a natagtagainepnak
A maysaakon a bangkay. Kayatam kadi
La unay a maisinaak kenka? Lipatennak
Iti lagipmo? Nupay kasta, agyamanak
Ti pannakalagipmo kaniak iti tagtagainepmo,
Agtriplento pay ti tawen a danonek.

Mangbirokak kadi iti sabali nga ayaten
Malaksid kenka? Ay saan, pangngaasim!
Iti hardinmo ti pakasay-opak ti banglo
No sadino ti makitak ket puro rosas.
Ngem gay-atek kadi nga iggaman dagiti siitna?

Saan!





MANGBIROKAK KADI ITI SABALI?
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com