Inayatnak, Ngem...

[nabulod ti ladawan a naaramat]

kunam,

inayatnak

ngem binukodam

ti ragsak…

nagalistoka ketdin

a simmiasi

iti dana a nagnaan

dagiti dapanta 

idi makabirokka

ti sabali 

a nakaabbukayan rikna

ken rimat dagita mata;

kunam pay idi

a mandar ti pusom 

nga ayatennak

ngem pinaglikudam 

pammatalged a balikasmo,

siak ti inkulbom; 

pinanawannak gaput’ gartem 

iti sabali a lasag—

kas ka la narasi 

a kayo ta alisto 

a naspak ti kari.

diakon pagarapaapan pay

sam-it agekmo 

ta papaitennak laeng

iti bibigmo, wenno

iliwen gumilgil-ayab

a bara dagiti arakupmo

ta imbilangnakon 

a nagrupsan a bangkay—

agpayso inayatnak, ngem…

inayatnak, ngem

rudy ram. rumbaoa

dagiti koleksion a daniw, sarita, kanta ken dadduma pay

www.samiwengkenayatnirudy.blogspot.com