Paset ti Daniw: TALLO A DANIW

[Nabulod ti ladawan a naaramat]

Binuya ni Laila ti apuy nga ipuypuyupoy ti angin
ti dandanin maibus a sineggedanna a kandela,
binidingbidingna ti urnos dagiti sabong
impanna iti plorera sana implastar iti ngatuen ti lapida.

Nagarimasa ti suli dagiti matana. Inaprosanna ti lapida
ket saannan a nalapdan panagregreg ti kimmistral a lua.
Wen, itay pay a kulkuldingen ti buridekna a babai nga agtawen
iti tallo ti panagawidda ta mangrugin a kumagat ti sipnget.

Mariknan ni Laila ti in-inut a panagkarayam ti lamiis iti bagina.
Mangrugin nga agpakada ti maudi a lawag ti init iti bantay
nga asideg ti nakaitabonan ni lakayna--daydi Lakay a Hawayano
a nagdaton kenkuana idi adda pay la idiay Filipinas.

Awanen daydi puon a nakaadakanna ti Hawaii
ngem nabiag latta dagiti batonlagip iti panunot, iti puso
ken rikna. Ket ti isusuknalna iti tanem ti Lakay a Hawayano,
nabukitkitan pay maminsan ti linabag ti napalabasna...





Naadaw iti paset ti daniw
TALLO A DANIW: LAILA, LISA KEN TI BALO [2o14]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com