Angep

[Nabulod ti ladawan a naaramat]


Nakariingak, diak ammo no kasanot'
kapaut pannakairidepko. Bimmangonak.
Awan tao a makitak iti balay. Awan ti inak,
awan pay ti amak ken agtagibalay a padak.
Nabaybay-an a nakalukat ti ridaw.
Naangep iti labes ti tawa.
Diak mamira iti ruar no adda
met la padak nga agbibiag. Uray iti uneg 
ti kuarto ken lamisaan a panganan, awan
malasinko-- nakudrep. Rimmuarak, tinurongko
ti hardin. Inlukatko ti pagserkan, nagpukaw
ti nagtakderak a balay. Inalun-on ti daga,
ngem naangep iti aglawlaw. Kasla nagtagtagainepak
a nakamulagat. Pagammuam
ta nagtakderak iti ngatuen ti maysa nga isla,
mariknak nga agtatapawak iti rabaw dagiti ulep.
Naibarikes iti bagik ti angep a kas man aglaylayagak
iti direksion nga agpalaud. Ngem naklaatak idi
pagammuam ta nagtayab ti isla nga adda iti babaen
ti sakak a nagtakderak-- baliktad ti nakitak
a napasamak. Diak mayaddang ken makataray
ta awanen ti daga a baddekak. Timpaw ti kararuak.
Nasarakak laengen ti nagango a kayo a nagbatayak.
Nagbatay met iti sanga ti maysa a tumatayab--
nabasa ken nakussokusso ti dutdotna. Napaksuyan
a nagpayakpak. Naturog iti nasukog nga umok. 
Nagtuloy ti panaglayagko ket ipagarupko payen
no maysaakon a bangkay. Nakitak ti maysa
a balay langanat' nabaybay-an ta awan makitak
nga arimekmek iti uneg, ngem adda nagkaatag
a matmaturog--maysa a lalaki, maysa a babai.
Ipagarupko no isuda dagiti nagannakko. Uray
dagiti kakabsat, awanda a matagtagitao. Awan
ragsak a naipinta a makita iti rupa ti lalaki
ken babai, makitak ketdi kadakuada ti nakana
nga ut-ot a sagsagabaen ken mangngegko
ti asugda. Naiturongak a naisubli iti nagappuak,
ti balay a saanen nga isut' pagtaengak. Kellaat
a nariingak. Nagsubli ti ganaygay, puot ken simbeng
ti nakemko. Masdaawak, addan sabali a tao
iti uneg--maysa a lumakay ken maysa a bumaket.
Isuda kadin ti agtagikua iti balay? nasaludsodko
ti bagik. Saan met ngarud nga isu ti amak,
wenno inak? Naglukat ti ridaw, naangep
iti labesna kas ti tawa. Uray iti kuarto ken lamisaan.
Nagpuraw nga asuk kas iti asuk ti nagbettak
a bomba. Uray iti aglawlaw, nabasa; agbabasa amin
a kas iti kaadu ti naibuyat a dara manipud iti sugat.
Rinamanak. Sumam-it sa naapgad ken pumait.
Pagammuam ta nagpakita iti sanguanak ti langa
ti maysa a kabakiran. Nakitak a naikuadro iti angep,
timpuar dagiti nalabbaga a banag--uray ti taaw,
nagbaliw ti marisna. Imbalunetko ti ridaw. Nagsardeng
ti kapintasan a panagpitik ti pagorasan. Nairidep
iti isisingising ti init iti daya ken nakariingak manen--
iti maikadua a gundaway. Diak ammo no pudno
a nakaturogak. No kasanot' kapaut pannakairidepko,
ngem ammok nga agang-angesak. Nadlawko
nga adda nagna iti likudan ti pader ken nangngegko
nga agngerngernger ti apuy iti dalikan.
Agkedkeden ti pagorasan nga agtrabaho. Diak payen ammo
no aldaw wenno rabii ti agdama a mapaspasamak.
Linuktak manen ti ridaw ngem ti rupak ti nakitak.
Adayo ken diak mamira ti bigat a pagsarmingan.

Kalpasan ti atiddog ken diak maawatan a pannakairidep,
no pudno man; mariknak tedted ti nabara a ling-et
ti atep a nagdisso iti rupak uray nalamiis ti tiempo
ken aglawlaw. Nariknak yaasideg ti maysa a banag:
Nabisngay ti angep iti dua. "Apo, kaasiannak!"
ket isun ti naudi a nakita ken nayesngawko.






ANGEP
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
cr.rrr.maui.o1.2o12