Ina

[Nabulod ti ladawan a naaramat]




Binuybuyak panangsulidmo ti amarilio a naranghita ken panangdekorasion
buokmo iti sabong. Ti pintas ti bistiam, kas ko la makita manen kinaubingko nga agay-ayam nga agdalupisak iti danum-tudo kalpasan bayakabak a kaduak 

ti bullalayaw; nagliblibbiang ti kasapulan a ragsak. Inlawlawagmo kaniak nga inabel dagiti managanito ti bullalayaw, impasngay ti lubong dagiti sabong
a saanna a narikna ti ut-ot ket nakitak ti ragsak iti apagbingi nga isemmo;

ti makasisirap a lawag ti init, ti rag-o iti aglawlaw. No agtaguob ti angin
iti taaw, makitak panagbuteng ti rupam, adda alliaw kadagita mata.
Inalistoam a sinulid ti amarilio a naranghita, inleppasmo ti estoriam

ken sinallapidmo ti buokmo iti nakaal-alisto. Iti isisiray kaippasngay
a lawag ti init iti sakaanan dagiti bantay iti daya ti balay, agsubliak
iti sidongmo. Agpunganak kadagita luppom nga agdengngeg iti estoria.

Tunggal aldaw nga aglabas linagipmo ti danumdanum a panagpasngaymo,
simmileng, limmawag ken rimmegta ti rupam a kas iti maris ti agpakada
nga ilelennek ti init. Ngem nadlawko a kasla saan a sikat' dati nga am-ammok,

kankantaam panangsabuag dagiti dalluyon ti yaagepda iti aplaya idinto
a ngumerngernger ti bosesmo ti panagpakada ti aldaw iti rabii. No kuan,
gungungen ti bagiw a mamalukay iti dalluyon ket mabatiak a martir

iti rekuerdo ti kinamaladaga. Uray siak, saan a natalinaay idi ti panunotko
no agtaguob ti angin-taaw. Adda met panagamakko. Adda panagbuteng,
ngem binuya, binambatayanka iti asideg ti warakwarak a maris kiaw

a panangharitaen a balay, pinerrengmo dagiti matak a kas iti bileg
ti maysa a diosa. Kinaagpaysuananna no yarigkot' bagik iti sabali,
maysaak a martir iti rekuerdo ti kinamaladaga ta inlemmeng ti rupak

ti nagkaadu a palimed nupay dagiti dalluyon iti Pasipiko ti kakaisuna
a makaammo ti an-anayen ti pusok. Nalabit, uray pay ti angin-taaw,
am-ammonak. Mamatiak ket ti pammatik maitalimengda iti pusok--

kunada, dagiti karayan ket annak a babai ti taaw idinto dagiti dan-aw
ken lago isudat' annakna a lallaki. Agpayso, saan a matabingan dagiti ulep
ti naganus a panunotko. Ngem no adda man nakabasolak, awan uray

asino, uray pay ti narungsot a dawel ti baybay wenno nadangkok 
nga alipugpog-taaw ti manglibeg iti pammatik gapuna a diak pulos
isukat ti pammati ti inak ta isu ti pammati a namulagatak, wenno

ti bileg dagiti inuugma a himno wenno kankanta a kinankantada idin,
wenno adda kinaagpaysuananna ti estoria ti amarilio a naranghita
a kastilio ti diosa iti taaw, ti nadaeg a nakaparsuaan a paggargarawan...





INA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com