Kunak Man...

[nabulod ti ladawan a naaramat]


iti sirok daytoy narukbos
a bulong dagiti kayo, napudot
ti aglawlaw. nadagaang pul-oy 
ti angin a mangapros iti pingping.
diak marikna ti bang-ar uray pay
addaak iti salinong ti ulila a kubo.
sensennaayennak ti panagmaymaysak,
kasla sisiak laeng ti parsua iti lubong...

ngem saan kadi a daytoy ti kayatko?
ti agmaymaysa? diak kayaten, kunak,
ngem apay a malaglagipka? apay
a parigatennak iti kasta unay?

ket bayat nga umun-uneg ti sugat,
umap-apges ti mariknak ngem ituredko
amin gaput' kalikagummo a nawaya.
ammok a dimon taliawen nalikudam,
dika pakadanagan ta ipadalankot'
tamudo ti ramayko iti daga
a tanda ti karik kenka.

mangrugi ken agngudo ti tawen
ket maulit a mairugi ken agngudo,
maulit-ulit a kas iti panagnasanas
ti ilelennek ti init 
iti laud ti karayan padsan;

kas met iti panaglabas dagiti aldaw
a mangibati ti maregmeg ti nalpasen
nga inkalub ti kalman,
dagiti batonlagip a naipasngay--

ah, rekuerdo a kas iti maysa a tugot
a minuli ti bukodna nga aniniwan...
.
.
.
.
kunak man
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com