Uray Bassit A Tiempo

[Nabulod ti ladawan a naaramat]

NASAPA a sardam a nakasangpetak ditoy The Island Maui Lani Subdivision a pagnaedanmi nga agama. Agarup 1.7 milia ti kaadayo iti Maui Medical Memorial Hospital a pagtrabahoak a kas emergency evening nurse.

Nariknak ti napalaus a paksuyko ita nga aldaw. Adu ti naitaray iti ospital a nagmalem. Kaaduan kadakuada iti aksidente ti kalsada. Pasaray sumangpetak iti tengngat' rabii no mairana nga agobraak ti Sabado wenno Domingo ken no adda maited nga overtime-ko. Naruamankon ti kastoy nga oras ti trabaho. Ngem kasiudotko la unay ti maysa nga homeless a tinamingko itay, ipilitna latta ti kayatna a nakalawlawag a maisalungasing iti pagalagadan ti ospital. Kayatna ti mai-confine iti ospital uray no saan met a grabe ti sugatna. Ammon ti mangimatmaton ti ospital daytoy nga estilo dagiti homeless ta malaksid a libre ti bayadanda iti agas, libre pay ti makan ken napintas a pagyananda. Imbag la ketdin ta inatipanak ni Bart, ti padak a nars iti pangmalem. No saan, amangan no naghaybladak. 

Nakitak ni Ethan, ti agtawen ti sangapulo ket uppat ken kakaisuna nga anakko a nagtakder iti sango ti ridaw ti balay. Nasdaawak. Iniddepko ti makina ti karro idi naigarahekon. Awan timtimekna. Inuraynak a limmaem iti balay. Ipagarupko pay ketdi no napan nakiinniliw ken ni lolana iti maikadua a nagkorosan a pagnaedanna manipud ditoy balay. Da tatang ken ni Maya, ti buridekmi a babai ti kabbalayna. Maysa met laeng a nars ni Maya iti ospital a pagpapaayak isuna lang ta pangbigat ti shift-na. Masansan ngamin a kaaduan nga oras a sangpetko manipud trabaho, nakaturogen ni Ethan. Naruamen nga agmaymaysa a mapampanawan. Ti ketdi telebision wenno video games ti pagpapasanna nga agmalmalem no awan iti eskuela. Sa maysa pay, online ti panagbasa dagiti ubbing ita gapu iti pandemia. Naruamkamin nga agama a kastoy ti situasionna manipud idi pimmanaw ti asawak a napan nakidenna iti sabali a lalaki--ken adu a rason a dimi pagkinnawaatan, nangruna iti pinansial a banag. Nagmano ken nagdaydayaw ni Ethan idi makalaemakon. 

"Nanganka kadin, 'Tang?" Sinaludsodna.

Nagtung-edak laeng apaman nga inyuldagko ti bagik iti sofa.

Kinapudnona, saan pay gapu iti kina-busy ti trabaho itay.

 

Immabay ni Ethan. "Adda koma saludsodek kenka, 'Tang," kuna ti ubing. "No mabalin."

"Sure, barok. 'Nia aya ti saludsodem?” Timmakderak. Immisemak a nangsango ti anakko.

"Mano kadi ti tangdanda kenka iti tunggal oras a panagtrabahom?"

Naklaatak iti dayta a saludsod ti ubing. Nagmuregregak. Gulpe a nagburek ti darak. Nagpungtotak. "Awan kalintegam a mangammo dayta a banag. Apay a saludsodem?"

"Kayatko la a maammuan, 'Tang. Awan dakesna. Pangngaasim ta ibagam no mano ti awatem tunggal oras a panagtrabahom?" agpigerger ti boses ni Ethan.

Nagmulagatak ti kasta unay. Diak ipagarup a saludsoden ti ubing ti kasta kaniak. Ken ita la nga aramidenna ti kasta. "Bayadandak ti 4o doliar iti kada oras."

"Ay! Kasta aya, 'Tang..." Naalumamay ti boses ti ubing sana indumog ti ulona. Nagpanunot. Idi agangay, intangadna met la ti ulona sana kuna kaniak, "Mabalin kadi a pabulodannak iti 2o doliar, 'Tang?"

Iti dayta a nangngegko, narubroban ti pungtotko. "No dayta la ti rason a pangdamagam no mano ti pagbayadda kaniak tapno ikkanka ti kuarta nga igatangmo iti baro a video games-mo, nasaysayaat laengen nga inka iti kuarto ken maturogkan. Panunotem, managimbubukodka. Daytoy ti laglagipem, inaldaw nga agtrabahoak tapno addanto nakasagana a gastosem iti masakbayan. Ngem ne, kitaem ti aramidmo," diak napengdan a ngimmato ti tono ti bosesko.

Napabutngan ni Ethan. Nagal-aludoy a nagturong iti kuartona sana impanalbaag ti ridaw.

Kaslaak kandela a narunaw a napatugaw iti sofa. Itay pay la a tengtenglek ti pungtotko. Abusta sipud simmangpetak a naggapu iti trabaho, nagpariknan a saan a nasayaat ti panagurayna kaniak iti ridaw ti balay. Sa maysa pay, saanak a naruam a pagsaludsodan ti kasta. Nalagipko la ngarud ti pimmanaw nga asawak. "Awan nagdumaanyo ken ni inam," nakemkemko ti sangik. "'Nia ketdin nga awan babainmo nga anak, saludsodem no mano ti awatek tunggal oras a panagtrabahok tapno laeng dumawat iti kuarta?” nataliawko ti kuarto ni Ethan.

Pinalabsak agingga ti dua nga oras a nagtugaw iti sofa. Kayatko a pagkalmaen ti riknak. Linuktak ti telebision, ngem awan maintonarak iti buybuyaek. Pinampanunotko ti kuna ni Ethan, ngem maburburtiannak no apay kasta ti aramidna ita a rabii. Saan met a kasta ti anakko, nakunak. Ti ammok no dumawat ti kuarta, adda gatangenna a video games wenno baro nga ay-ayam. Ngem nariknak a kasla adda nangsipat iti mugingko. Namurmurayanak. Apay ngamin nga imutak no dayta ti ammok a pagragsakan ti barok? nasaludsodko. Sa maysa, bugbugtong la ngaruden a parupak. Tinapayak ti ulok saan a gapu iti daytoy a napasamak no di ket maburburtiaannak kenkuana.

Nagpanunotak. Idi agangay, tinurongko ti kuarto ni Ethan. Inin-innayadko a pinuligos ti seradora ti ridaw. Simmiripak. Nakasilaw. Nakaidda,  immunegak sa nagtugaw iti iking ti katre. Iti abay ni Ethan.
Nabaringkuas ti ubing iti iddana. Nagtugaw a simmango kaniak. "Apay, 'Tang?"

Ti panangawagna kaniak iti 'Tang ti maysa a kasam-itan a balikas a denggen ti lapayagko nangruna no duduakami nga agama nga adda iti balay. "Adda ibagak, Ethan. Pinanunotko a naimbag ti imbagam kaniak itay, ngem diak maawatan ti kayatmo a sawen. Ti rason no apay a dinamagmo ti kasdiay kaniak. Ammok a nasaktanka iti sinaok," naalumamay ti bosesko. Pinerrengko ti ubing ngem lisianna a kitaen dagiti matak. "Atiddog unay ti maysa a rabii tapno saan nga agbaaw ti pungtotko kenka. Ne, adtoy ti dawdawatem a 2o doliar," inyawatko ti kuarta.

Uray la napalagto ni Ethan iti ragsakna idi inawatna ti kuarta. Napaanggo kaniak.

"Sori, ha?" kunak manen.

Dinak sinungbatan ngem nakitak nga adda innalana a banag iti pandag ti punganna. Nagmulagatak idi makitak ti rineppetna iti lastiko a sagmamaysa a doliar. Binilang ni Ethan sanak tinangad.

Gapu iti daytoy a naimatangak, nasindian manen ti pungtotko. Madlawko a mangrugin a ngumato ti presion ti darak. "Apay a kasapulam ti adu a kuarta no adda metten kenka?" diak nagawidan a sinaludsod kenkuana. Siak itan ti agpigpigerger. Kayatko a bulosan ti pungtotko, ngem at-atipaek ti riknak.

"Gapu ta saan a makaanay no awan ti 2o doliar, 'Tang. Ngem gapu ta inikkannak, amman. Nasursurok pay ketdin," insungbat ni Ethan. Umis-isem.

Maburburtiaannak latta. Diak makaut ti kayat a sawen ti ubing.
"Nakaurnongakon ti 45 a doliar ket agyamanak iti intedmo a 2o. Nasursurok ngem iti kalikagumko. Mabalin kadi a gatangen ti orasmo, 'Tang?”

Nagmulagatak iti saona.

"Pangngaasim kadi ta agawidka a masapa no bigat. Kayatko nga aggeddanta a mangan iti pangrabii. Kailiwko unay," pinerrengnak ni Ethan.

Urayak la limmabbasit iti kuna ti anakko gapu't bainko. Ita, maabisigkon no apay a kasta unay ti pagkasapulan ni Ethan iti 2o doliar. Ammok, saan a napadasan ti pimmanaw nga asawak ti kastoy ta dina pulos narikna ti rigatko ita. Pudno, napateg ti 4o doliar a masapulak iti tunggal oras ngem napatpateg nga amang nga adayo ti panangibubos ti tiempo iti tao nga ay-ayaten ken ipatpateg. Napaluaak. Daytoy ti gundawayko, kunak. Inarakupko ni Ethan iti nairut. Nair-irut pay ngem iti panangpetpetko ti kuarta a masapulak.***

.

.

.

.

.
URAY BASSIT A TIEMPO
Imbiit ni Rudy Ram. Rumbaoa a.k.a Tom Kengeri

www.samiwengkenayatnirudy.blogspot.com