No dadduma, dimo mailawlawag
ti kaunegan a debosion nga ar-aramidem;
dagiti sakripisio ken panagibtur
a kas man awan pagnguddoan, awan panagbukbukod
ken no mabalin awan sikreto,
dimo ipalubos a marpuog
wenno mayadayo ti ik-ikutam a kinaanusmo
Naasika ken sindadaan a mamakawan
kadagiti biddut a maaramid. Saanmo ketdi
padpadasen ti mapaay uray no mapuris
ti pusom ken mariknam apges ti sugat
a kasla saggaysa a mapirpirsay ti pasetna;
Mamatika ket mamatikanto latta
iti labes ti nagkaadu a pannakasuotmo
nga adda balligi a magun-odmo
iti daytoy nakiro a lubong a paggargarawan
nga isut' karaniagan nga andap
Kenka kadagiti amin a napipintas
a banag a makita bayat ti panagbiagmo
ken manmano a maaprosan dagiti napateg
a klasena a bato a kas ti diamante,
balitok wenno pirak; ngem ti ayatmo Ina,
Saan a gangandiong, saan a peke
no di ket pudno a naibaklay kadagiti abaga
ti akmen a responsibilidad ta amin dagitoy
nalablabes pay ngem ti itudo a pagrebbengan
nga ayat ken dungngo bilang Ina ta karitenna
amin a pannakailawlawag iti tunggal makita,
Maaprosan ken marikna ngem agtalinaed
a sikreto a kas iti misterio ti nakaparsuaan
ken kas ti kinadayag ken kinangayed
a milagro a saanto pulos maawatan ti tao
ti kaipapananna-- ta maysa daytoy
nga ebidensia a pagsidsiddaawan
a kaasi ti Dios iti panangibagnosna ti lubong.
.
.
.
.
.
AYAT [TI MAYSA NGA INA]
Rudy Ram. Rumbaoa
samiwengkenayatnirudy.blogspot.com
[nabulod ti ladawan a nausar]
No comments:
Post a Comment