iti sirok ti asul a tangatang
kas kimat ti panagturongko kenka
bayat a nabannayat
ti panaggunay dagiti aldaw
ammok nga iti bukod a pagtaengan
maysaak a di makita nga anniniwan
a kas iti isasarungkar ti al-alia
magnaak kadagiti kawaw a pader
mariknak ti pannakayaw-awanko
iti sirok ti asul a tangatang
ibabawik
ti panangsapulko iti kinapudno
inar-arapaapko ti ritmo
wenno panagdanggay dagiti pusota
sikakalmadoak; bumaringkuaska
wen, narigat nga allilawen
ti ayat, wenno kannawidan
ket baybay-an ti bukod a pagsasao
tapno agpukaw lattan
a maipalais iti di masinunuo a masakbayan
ngem naibagan kaniak
nga awan ti pagnguduan ti ragsak
no ti pusom siwawaya
no maawatm ti kinaasinom
ket sungbatan ti ayat iti ayat
ket masansan
nga agsidsiddawak iti daytoy a biag
a nakakidem dagiti matak.
.
.
.
.
.
iti asul a tangatang [unedited]
rudy ram. rumbaoa
naipablaak ti edited version-na
iti bannawag iti april 29, 2013 issue
samiwengkenayatnirudy.blogspot.com
No comments:
Post a Comment