Ita Nga Aldaw

awan nangibaga kaniak nga adu

ti barikada iti daytoy a dalan---

tunggal mabagkat dapan iti panagaksawko

mariknak a nadagsen panagangesko,

kasla sisiak laeng ti magmagna

agmaymaysa a managtaltalunton

iti dana a diak ammo ti pagnguddoanna.

nakipinnerrengak ken ni patay ngem

nagal-aludoy a pimmanaw ket masdaawak

no apay a saan a siak ti adda iti tanem,

no apay a siak ti nasalbar iti pannakasuot?

.

.

.

.

.

ita nga aldaw

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]