Saludsod

 

Dinamagko iti maysa a lalaki

A nagtakder iti karinderia

No ungto ti dalan daytoy nagmattiderak.

Manipud ditoy kunana; adu ti ungto a pagnaan

Agdiretsoka ket siputam ti sirok dagiti sakam

No bumallasiwka a mapan iti sabali a daga,

Dimo sirigen ti init, makipagbaniaganto kenka

Ti dana a pagdaliasatam.

Dinamagko iti maysa a babai

A nakadalungdong iti delana a belo

No adda ditoy dagiti pader,

Addada ditoy kunana; ken adda pader

Iti labes dagiti pader, makitam kadi

Dagitoy umel a tattao? Agpayso, mangngegmo

Ti bosesda no idennesmo ti lapayagmo

Kadagiti paguyasan, wenno denggem

Ti agsasaruno a panaglibbuong ti kayo iti dalikan-

Makipagbaniaganto kenka dagiti pader.

Dinamagko iti ubing a nakabisikleta

A mangkudkudkod ti tumengna no daytoy

Ti pangrugian ken pagpatinggaan ti dalan.

Saan, kunana, ta saan amin a banag

Ket mairugi ditoy, ken ni kaanoman ket saan

Nga agngudo; ket ania man a pagnguddoanna

Ket saan pay a nangrugi.

Dagiti sungbat ket isuda dagiti saludsod

Ket awan koma tumpuar nga adu a saludsod-

Ngarud, saan koma a padpadasen a sapulen

Ti maysa a banag iti mammaminsan.

.

.

.

.

.

SALUDSOD

Rudy Ram. Rumbaoa

samiwengkenayatnirudy.blogspot.com

[nabulod ti ladawan a nausar]